Wararka24: Guddiga Madaxa bannaan ee Xuquuqul Insaanka Qaranka Soomaaliyeed ayaa walaac ka muujiyay xarigga Sacdiya Macallin Cali oo muddo ka badan bil ku xiran Xabsiga Dhexe ee Muqdisho iyadoo aan weli si rasmi ah maxkamada loo horgeyn.
War saxaafadeed kasoo baxay guddiga ayaa lagu sheegay in 29-kii Abriil ay booqasho ku tageen Xabsiga Dhexe ee Muqdisho si ay ula socdaan xaaladda xabsiga iyo duruufaha ay ku sugan tahay Sacdiya. Guddiga ayaa sheegay inay la kulmeen maamulka xabsiga, saraakiisha ciidamada asluubta, Sacdiya lafteeda iyo qareenkeeda.
Sida lagu sheegay war kasoo baxay Xafiiska Xeer Ilaalinta Qaranka 6-dii May, Sacdiya waxaa loo haystaa eedeymo la xiriira sumcad-dilid iyo kicin bulsho. Hase yeeshee, guddiga xuquuqul insaanka ayaa sheegay in aan weli la muddeyn dhageysiga dacwadeeda, taas oo ay ku tilmaameen arrin saameyn karta xaqa garsoor caddaaladeed.
Sacdiya ayaa guddiga u sheegtay inay xabsiga kala kulantay dhibaatooyin ay kamid yihiin cabsi gelin, cunto yari, ciriiri iyo nadaafad xumo. Waxay sidoo kale sheegtay in xaddidaad lagu sameeyay booqashooyinka qoyskeeda.
Guddiga ayaa xusay inuusan si madax-bannaan u xaqiijin karin dhammaan cabashooyinkaasi, balse uu ku baaqay baaritaan hufan oo lagu sameeyo xaaladda ay sheegtay maxbuusadda.
Guddoomiyaha guddiga Maryam Qasim ayaa sheegtay in qofka xiran uu weli leeyahay xuquuqdiisa aasaasiga ah. Waxay carrabka ku adkeysay muhiimadda ay leedahay in maxaabiista loo fidiyo daryeel caafimaad, ilaalin sharci iyo in loola dhaqmo si bani’aadannimo leh.
Guddiga Madaxa-bannaan ee Xuquuqul Insaanka Qaranka Soomaaliyeed ayaa ugu dambeyn ugu baaqay hay’adaha dowladda inay dedejiyaan hanaanka garsoorka, isla markaana si buuxda loo ilaaliyo xuquuqda dadka xiran, gaar ahaan kuwa aan wali maxkamada la horgeyn.
