Wararka24: Guddoomiyaha Guddiga Madaxa-bannaan ee Xuquuqul Insaanka Qaranka, Dr Maryam Qaasim, ayaa maanta magaalada Muqdisho ku qaabbishay Madaxa Ergada Hey’adda Caalamiga ah ee Laanqayrta Cas ee Soomaaliya, Antoine Grand, iyagoo ka wada hadlay xoojinta wada-shaqeynta labada dhinac.
Kulanka ayaa diiradda lagu saaray arrimo muhiim ah oo la xiriira ilaalinta dadka rayidka ah, gaar ahaan xilliyada ay jiraan xaaladaha amni iyo bani’aadannimo ee dalka ka jira. Labada dhinac ayaa isla gartay muhiimadda ay leedahay dhowrista xuquuqda aas-aasiga ah ee muwaadiniinta.
Sidoo kale, waxaa si gaar ah looga hadlay kormeerka xarumaha lagu hayo dadka xiran iyo xabsiyada, si loo hubiyo in dadkaasi ay helaan xuquuqdooda sharciga ah, loona ilaaliyo karaamadooda bini’aadannimo.
Mas’uuliyiinta ayaa sidoo kale falanqeeyay sidii loo xoojin lahaa ixtiraamka shuruucda caalamiga ah ee bani’aadannimada iyo xuquuqul insaanka, kuwaas oo door muhiim ah ka qaata ilaalinta shacabka xilliyada colaadaha iyo xaaladaha adag.
Kulanka ayaa kusoo dhammaaday is-afgarad ku saabsan in la sii xoojiyo iskaashiga dhinacyada is gaarsiinta gargaarka bani’aadannimo, taageeridda bulshada nugul iyo horumarinta nidaamyada qaran ee ilaalinta xuquuqul insaanka.
