Wararka24: Anthony James Kazmierczak oo ku nool magaalada Minneapolis ayaa maxkamada federaalka ka hor qirtay dambi la xiriira weerar uu ku qaaday xildhibaanad Ilhan Omar, kadib dhacdo ka dhacday kulan dadweyne oo ay horraantii sanadkan qabatay.
Ninka oo lagu magacaabo Anthony James Kazmierczak, 55 jir ah, ayaa qirtay inuu silinge ku buufiyay isugu jiray biyo iyo khal, xilli Ilhaan Cumar ay khudbad u jeedineysay taageerayaasheeda.
Sida lagu sheegay dacwadda, eedeysanaha ayaa weerarka fuliyay isaga oo ku qeylinayay erayo uu ku dhaliilayay xildhibaanadda, ka hor inta aysan si degdeg ah u qaban ciidamada ammaanka ee goobta joogay.
Maxkamadda ayaa sheegtay in dambiga uu qirtay ninkan uu sababi karo xukun gaaraya illaa siddeed sano oo xabsi ah, iyadoo go’aanka kama dambaysta ah la filayo in la gaaro marka la soo gabagabeeyo dhageysiga dacwadda.
Intii ay socotay dhageysiga maxkamadda, garsooraha ayaa su’aalo ka weydiiyay eedeysanaha dhacdada, halka uu isna sheegay in xasuustiisa habeenkaasi ay ahayd mid aan si buuxda u caddayn.
Marka laga soo tago kiiska federaalka, Kazmierczak ayaa sidoo kale wajahaya dacwado heer gobol ah oo la xiriira hanjabaad iyo weerar, kuwaas oo la filayo in dib loo bilaabo marka la soo afjaro dacwadda federaalka.
Ilhaan Cumar ayaa dhacdada kadib sheegtay in weerarkaasi uusan ka hor istaagi doonin gudashada waajibaadkeeda, iyadoo xustay in aysan u oggolaan doonin cabsi gelin inay saameyso shaqadeeda siyaasadeed.
