Mbabane – Dowladda Eswatini ayaa shaaca ka qaaday in 32 askari oo ka tirsan ciidanka Booliska dalkaas loo diray Soomaaliya, si ay ugu biiraan howlgalka nabad ilaalinta Midowga Afrika ee ka socda gudaha dalka.
Askarigan ayaa loogu talagalay inay ilaaliyaan amniga Soomaaliya, gaar ahaan goobaha muhiimka ah ee dowladdu ku shaqeyso. Taliyaha guud ee Booliska Boqortooyada Eswatini, Manoma Vusie, ayaa ciidanka u diray dar-daaran ku aaddan ilaalinta anshaxa iyo in ay u naxariistaan shacabka Soomaaliyeed.
Eswatini oo ku taalla koonfurta qaaradda Afrika, kuna dhex taalla Koonfur Afrika iyo Mozambique, waa dal yar oo ku dhowaad hal milyan oo qof ay ku nool yihiin.
Dalkaas waxaa lagu tiriyaa midka ugu badan ee ay dadkiisu qabaan cudurka HIV/AIDS, iyadoo ku dhowaad 27% bulshada uu saameeyay cudurkaasi.
Eswatini waxaa xukuma Boqor Mswati III, kaas oo la caleemo saaray sanadkii 1986 xilligii uu 18 jir ahaa.
Boqorkan ayaa caan ku ah nolol raaxo iyo guur badan, waxaana loo arkaa mid ka mid ah boqorrada ugu hantida badan qaaradda Afrika.
