Wararka24: Madaxweynaha Turkiga, Rajab Dayib Erdoğan, ayaa sheegay in dalkiisa uu maanta yahay rajada ay ka war sugayaan dalal iyo bulshooyin badan oo ka tirsan dunida Islaamka, isaga oo xusay in doorka Ankara uu sii kordhayo dhinacyada amniga, horumarka iyo gargaarka bani’aadannimada.
Erdoğan oo khudbad u jeedinayay xubnaha iyo taageerayaasha xisbigiisa AK Party ayaa sheegay in xisbiga talada haya iyo dowladda Turkigu aysan rajo u ahayn shacabka Turkiga oo keliya, balse ay sidoo kale rajo u yihiin dalal iyo bulshooyin badan oo ku nool dunida Islaamka iyo gobollada ay colaadaha saameeyeen.
Madaxweynaha Turkiga ayaa si gaar ah u xusay magaalooyin iyo dalal dhowr ah oo uu sheegay inay indhaha ku hayaan doorka Turkiga, isagoo yiri, “Ha niyad jabina. Waxaad tihiin rajada keliya ee Qasa, Dimishiq, Xalab, Muqdisho, Khartuum, Bayruud, Tripoli, Shaam iyo Lubnaan.”
Erdoğan ayaa sidoo kale sheegay in magaalooyin iyo dalal kale ay si dhow ula socdaan siyaasadda iyo doorka Turkiga, isagoo ku boorriyay xubnaha xisbigiisa inay sii laba jibbaaraan dadaallada iyo shaqada ay u hayaan dalkooda.
Hadalka madaxweynaha Turkiga ayaa mar kale muujinaya muhiimadda ay Ankara siinayso Soomaaliya, xilli xiriirka labada dal uu gaaray heerkii ugu sarreeyay tan iyo booqashadii ugu horreysay ee Erdoğan uu ku tegay Muqdisho sanadkii 2011.
Booqashadaas ayaa ku soo beegantay xilli Soomaaliya ay wajahaysey xaalado adag oo dhanka amniga iyo abaaraha ah, waxaana tan iyo xilligaas Turkigu uu noqday mid ka mid ah saaxiibbada ugu waaweyn ee Soomaaliya.
Turkiga ayaa Soomaaliya ka hirgeliyay mashaariic la xiriira kaabeyaasha dhaqaalaha, caafimaadka, waxbarashada iyo gargaarka bani’aadannimada. Sidoo kale, Ankara ayaa door muuqda ka qaadatay dib-u-dhiska ciidamada Soomaaliya, iyadoo Muqdisho ka dhistay xerada tababarka ciidamada ee TURKSOM.
Labada dal ayaa sidoo kale sii xoojiyay iskaashigooda dhinacyada tamarta iyo dhaqaalaha, iyadoo Turkigu uu ka wado xeebaha Soomaaliya hawlo sahamin iyo baaritaan ku saabsan khayraadka dabiiciga ah.
