Wararka24: Dowladda Federaalka Soomaaliya ayaa tacsi u dirtay Boqortooyada Sacuudi Carabiya kadib shil diyaaradeed oo ka dhacay gobolka Ras Tanura, kaas oo ay ku burburtay diyaarad qumaatiga u kacda oo ay leedahay shirkadda Saudi Aramco.
War-saxaafadeed kasoo baxay Wasaaradda Arrimaha Dibadda iyo Iskaashiga Caalamiga ah ayaa lagu sheegay in Soomaaliya ay ka murugootay dhimashada 14 muwaadiniin Sacuudiyaan ah oo ku geeriyooday shilkaasi.
“Wasaaradda Arrimaha Dibadda iyo Iskaashiga Caalamiga ah ee JFS waxay tacsi tiiraanyo leh u direysaa Dowladda iyo shacabka Boqortooyada Sacuudi Carabiya kaddib shilkii naxdinta lahaa ee diyaaradda qumaatiga u kaca ee shirkadda Saudi Aramco ee ka dhacay Gobolka Ras Tanura,” ayaa lagu yiri war-saxaafadeedka.
Dowladda Soomaaliya ayaa sheegtay inay si buuxda ula garab taagan tahay Sacuudiga xilligan adag, iyadoo Alle uga bariday dadkii ku dhintay shilka inuu naxariistiisa siiyo, samir iyo iimaanna ka siiyo ehelladooda iyo shacabka Sacuudiga.
Wasaaraddu waxay sidoo kale dib u xaqiijisay xiriirka walaaltinimo iyo iskaashiga soo jireenka ah ee u dhexeeya Soomaaliya iyo Sacuudi Carabiya, iyadoo xustay in labada dal ay leeyihiin xiriir diblomaasiyadeed oo qoto dheer.
Boqortooyada Sacuudi Carabiya ayaa kamid ah waddamada Carbeed ee taageerada kala duwan siiya Soomaaliya, gaar ahaan dhinacyada horumarinta, gargaarka bani’aadannimada iyo iskaashiga dhaqaalaha.
