Wararka24: Maamulka Waqooyi Bari Soomaaliya ayaa soo saaray amar lagu mamnuucayo in dadka aan ka tirsanayn ciidamada amniga ay xirtaan dareyska ama astaamaha ciidamada.
Warsaxaafadeed ka soo baxay Wasaaradda Amniga ee maamulka ayaa lagu faray Taliska Booliska inuu si degdeg ah u dhaqan-geliyo amarkaasi, isla markaana tallaabo sharci ah laga qaado cid kasta oo lagu qabto iyadoo si aan sharci ahayn u xiran dareyska ciidamada.
Wasaaraddu waxay sheegtay in mamnuucidda ay khusayso dhammaan noocyada dharka, astaamaha iyo calaamadaha ay adeegsadaan ciidamada amniga, iyadoo lagu adkeeyay in isticmaalka agabkaasi uu ku koobnaan doono xubnaha sida rasmiga ah uga tirsan hay’adaha ammaanka.
Qoraalka ayaa sidoo kale lagu sheegay in qof kasta oo jebiya amarkan laga qaadi doono tallaabooyin waafaqsan xeerarka amniga iyo shuruucda dalka.
Mas’uuliyiinta maamulka ayaa sheegay in ujeeddada tallaabadan ay tahay xoojinta amniga, ka hortagga isticmaalka sharci darrada ah ee astaamaha ciidamada iyo ilaalinta kala dambeynta.
Go’aankan ayaa kusoo beegmaya xilli maamulka Waqooyi Bari uu ku howlan yahay wax ka qabashada colaadaha beeleed ee ka taagan gobolka Sool, iyadoo wararku sheegayaan in ay kordheen dadka ku sugan deegaannada colaadaha oo xiran dareyska ciidamada.
