Wararka24: Wafdi ka socda Dowladda Federaalka Soomaaliya ayaa maanta gaaray degmada Luuq ee gobolka Gedo, halkaas oo si weyn loogu soo dhaweeyay, iyadoo wafdigu bilaabay kulamo la xiriira xaaladda deegaanka.
Wafdigan waxaa hoggaaminaya Wasiir Ku-xigeenka Wasaaradda Waxbarashada Soomaaliya, Cabdirashiid Maxamed Ducaale, oo sheegay in socdaalkoodu la xiriiro wada-tashi iyo dadaallo nabadeed oo lagu xallinayo xaaladaha ka jira degmada.
Cabdirashiid Maxamed Ducaale ayaa sheegay in dowladda ay doonayso inay gogol nabadeed u fidiso bulshada degmada, si xal looga gaaro colaadaha mudada dheer ka jiray Luuq, kuwaas oo saameyn ku yeeshay nolosha shacabka iyo amniga deegaanka.
Wasiirka ayaa tilmaamay in kulamada ay la yeelanayaan waxgaradka iyo qeybaha kala duwan ee bulshada ay salka ku hayaan sidii loo heli lahaa xal waara oo lagu soo afjaro colaadaha gudaha.
Sidoo kale, wuxuu sheegay in dowladda ay qorsheyneyso dib-u-habeyn lagu sameeyo ciidamada ku sugan degmada, si loo xoojiyo howl-galladooda loona xaqiijiyo xuquuqdooda, maadaama ay jiraan cabashooyin la xiriira duruufaha ay ku shaqeynayaan.
Degmada Luuq ayaa muddooyinkii dambe wajahaysay xiisado amni iyo dagaallo beeleedyo soo noqnoqday, iyadoo dowladda federaalka ay haatan dadaal ugu jirto xasilinta degmada iyo dib-u-heshiisiinta bulshada.
Socdaalka wafdigan ayaa kusoo aadaya xilli gobolka Gedo uu wajahayo xaalado siyaasadeed iyo amni oo u baahan xal degdeg ah, si loo xaqiijiyo xasilloonida iyo wada-noolaanshaha bulshada.
