Ra’iisul Wasaaraha Soomaaliya, Xamza Cabdi Barre, ayaa difaacay qorshaha Dowladda Federaalka ee ka socda deegaannada Puntland, isaga oo sheegay in dowladda ay gudaneyso waajibaadkeeda qaran, ayna xaq u leedahay inay adeegyo gaarsiiso dhammaan qaybaha dalka.
Ra’iisul Wasaaraha ayaa hadalkan ka jeediyay munaasabad lagu daah-furayay dhismaha cusub ee Wasaaradda Beeraha iyo Waraabka, isagoo meesha ka saaray eedeymaha sheegaya in dowladda dhexe ay faragelin ku hayso Puntland.
Xamza ayaa sheegay in Dowladda Federaalka ay mas’uul ka tahay dalka oo dhan, isla markaana ay xaq u leedahay inay shaqaale qorto, adeegyo gaarsiiso iyo inay booqato deegaan kasta oo Soomaaliyeed.
“Goormee noqotay in dowladda Soomaaliyeed ay dalkeeda adeeg gayso, qof Soomaali ah shaqaaleysiiso ama booqato ay noqoto faragelin?” ayuu yiri Ra’iisul Wasaaraha.
Hadallada Xamza ayaa kusoo aadaya xilli uu sii xoogeysanayo khilaafka siyaasadeed ee u dhexeeya Dowladda Federaalka iyo maamulka Puntland, gaar ahaan arrimaha la xiriira qorista ciidamada iyo maamulka amniga.
Ra’iisul Wasaaraha ayaa sidoo kale si dadban u dhaliilay siyaasiyiinta kasoo horjeeda dowladda, isagoo ku eedeeyay inay mudnaanta siinayaan dano siyaasadeed oo gaar ah, halkii ay ka hormarin lahaayeen danta guud ee dalka.
Dhankiisa, maamulka Puntland ayaa hore uga horyimid tallaabooyinka dowladda dhexe ee ku saabsan abaabulka ciidamada gudaha Puntland, isagoo ku tilmaamay kuwo ka hor imanaya nidaamka federaalka.
Khilaafka u dhexeeya Muqdisho iyo Garoowe ayaa sii xoogeysanayay bilihii la soo dhaafay, iyadoo labada dhinac ay isku hayaan arrimo ay ka mid yihiin amniga, doorashooyinka iyo awood-qaybsiga siyaasadeed.
