Wararka24: 10-02-2026 Ciidamada Daraawiishta iyo kuwa Nabadsugidda dowlad-goboleedka Jubbaland ayaa maanta howlgal qorsheysan ka fuliyay deegaanno hoos yimaada Kudhaa ee gobolka Jubbada Hoose, sida ay sheegeen saraakiil ka tirsan maamulka.
Howlgalka ayaa yimid kadib markii ciidamada ay weerar ku qaadeen goobo la sheegay inay ku sugnaayeen xubno ka tirsan Al-Shabaab oo la sheegay inay halkaasi ku uruursanayeen.
Saraakiil ka tirsan Jubbaland oo si hordhac ah uga hadlay howlgalka ayaa sheegay in ciidamada ay gaareen bartilmaameedkii loo qorsheeyay, isla markaana kooxda Al-Shabaab lagu gaarsiiyay khasaare, inkastoo aan la shaacin tirada rasmiga ah ee khasaaraha.
Waxay sidoo kale sheegeen in howlgalka uu socday saacado, islamarkaana lagu burburiyay fariisimo ay kooxda ku lahayd deegaannada la weeraray, iyadoo ciidamada ay gacanta ku dhigeen hub iyo agab ciidan.
Dadka deegaanka ayaa dhankooda sheegay in rasaas culus iyo qaraxyo laga maqlayay goobaha uu dagaalku ka socday, taas oo muujineysa culayska iska horimaadka.
Ciidamada Jubbaland ayaa muddooyinkii u dambeeyay kordhiyay howl-gallada ka dhanka ah Al-Shabaab ee ka socda qeybo ka mid ah gobolka Jubbada Hoose, gaar ahaan deegaannada ku dhow xadka Kenya iyo kuwa hoos yimaada degmooyinka Badhaadhe iyo Afmadow.
