Wararka24: Bulshada rayidka Soomaaliyeed ayaa war culus kasoo saartay khilaafka siyaasadeed ee ka dhex taagan dowladda federaalka iyo Golaha Mustaqbalka Soomaaliyeed, iyagoo ku baaqay in la helo xal degdeg ah oo looga hortago sii xumaanshaha xaaladda siyaasadeed ee dalka.
Guddoomiyaha ururka bulshada rayidka Soomaaliyeed, Cismaan Muxidiin Shaatax, oo shir jaraa’id ku qabtay Muqdisho ayaa sheegay in kulamo dhowr maalmood socday ay ku falanqeeyeen xaaladda guud ee dalka, gaar ahaan ismari-waaga siyaasadeed ee hareeyay arrimaha doorashooyinka, dastuurka iyo muddo-xileedka hay’adaha dowladda.
Shaatax ayaa sheegay in intii ay socdeen kulamadooda ay la kulmeen siyaasiyiin ka kala tirsan dowladda iyo mucaaradka, isla markaana ay ka dhageysteen aragtiyadooda ku aaddan sida loo wajahayo doorashooyinka dalka. Wuxuu tilmaamay in muranka ugu weyn uusan ahayn qabsoomidda doorashada qof iyo cod, balse uu ku saabsan yahay hannaan lagu kalsoonaan karo oo loo dhan yahay.
Warsaxaafadeedka ay soo saareen bulshada rayidka ayaa lagu sheegay in dhinacyada siyaasadda ay u baahan yihiin inay muujiyaan tanaasul iyo dabacsanaan siyaasadeed, si loo helo heshiis qaran oo horseeda doorasho heshiis lagu yahay.
Bulshada rayidka waxay sidoo kale ka digeen in sii socoshada khilaafka siyaasadeed ay keeni karto kala fogaansho hor leh iyo xaalad amni oo saameyn ku yeelata xasilloonida dalka, xilli Soomaaliya ku jirto marxalad siyaasadeed oo xasaasi ah.
Baaqan ayaa imanaya iyadoo indhaha siyaasadda lagu hayo kulanka 10-ka May ee uu Madaxweyne Xassan Sheekh Maxamud ku casuumay Golaha Mustaqbalka, kaas oo la filayo inuu noqdo mid muhiim ah oo lagu qiimeeyo fursadda heshiis siyaasadeed oo cusub.
