Wararka24: Golaha Mustaqbalka Soomaaliyeed ayaa shaaciyay inay diyaar u yihiin ka qeyb-galka gogosha wada-hadalka ee uu fidiyay Madaxweynaha Soomaaliya Xasan Sheekh Maxamuud, balse ku xiray shuruudo ay sheegeen inay muhiim u yihiin hirgelinta wadahadal dhab ah.
Bayaan kasoo baxay golaha ayaa lagu sheegay in mucaaradku soo dhoweynayaan casuumaadda kulanka siyaasadeed ee la qorsheeyay 10-ka May 2026, hase yeeshee ay qabaan walaac ku saabsan jawiga siyaasadeed ee ka jira dalka iyo tallaabooyinka ay dowladda waddo.
Goluhu wuxuu ku eedeeyay dowladda inay weli sii waddo waxa ay ku tilmaameen doorashooyin hal dhinac ah, isla markaana ay jiraan xarigyo iyo barakicin ay sheegeen inay dhaawac ku yihiin jawiga wadahadalka iyo is-afgaradka siyaasadeed.
Mucaaradka ayaa sheegay in wadahadal dhab ah uu suurta geli karo oo keliya haddii madaxweynuhu joojiyo dhammaan tallaabooyinka doorasho ee ay ku tilmaameen kuwo aan heshiis siyaasadeed ku dhisneyn, si loo abuuro jawi lagu kalsoonaan karo.
Sidoo kale, Golaha Mustaqbalka ayaa dalbaday in la helo hannaan dhex-dhexaadin madax-bannaan oo ay isku raacsan yihiin dhammaan dhinacyada siyaasadda, si loo xaqiijiyo in wada-hadalladu noqdaan kuwo daah-furan oo miro-dhal ah.
Goluhu wuxuu ku adkeystay in heshiis siyaasadeed oo ku saabsan doorashooyinka dalka la gaaro kahor 15-ka May 2026, oo ay ku sheegayaan inay ku egtahay muddada xilka madaxweynaha. Waxay sidoo kale ka digeen in haddii aan heshiis la gaarin ay qaadi doonaan tallaabooyin kale oo ay ku sheegeen kuwo lagu ilaalinayo dowladnimada iyo midnimada dalka.
