Wararka24: Hawlgalka Kaalmaynta Qaramada Midoobay ee Soomaaliya (UNTMIS) ayaa war-saxaafadeed kasoo saaray wada-hadallada siyaasadeed ee u dhexeeya Dowladda Federaalka Soomaaliya iyo mucaaradka, kuwaas oo maalmahan ka socday magaalada Muqdisho.
UNTMIS ayaa sheegtay inay fududeysay kulamo ay yeesheen Dowladda Federaalka Soomaaliya iyo xubno ka tirsan saamilayda mucaaradka, iyadoo wada-hadallada ay goobjoog ka ahaayeen wakiillo ka socday Midowga Yurub, Safaaradda Boqortooyada Ingiriiska, Safaaradda Mareykanka iyo Safaaradda Turkiga ee Soomaaliya.
War-saxaafadeedka ayaa lagu sheegay in kulamadu ku qabsoomeen jawi saaxiibtinimo iyo is-ixtiraam ku dhisan, isla markaana ay dhinacyadu yeesheen wada-hadallo wax ku ool ah oo la xiriira arrimaha siyaasadda iyo mustaqbalka geeddi-socodka doorashooyinka Soomaaliya.
UNTMIS waxay xustay in qodobka ugu weyn ee laga wada hadlay uu ahaa sidii loo abuuri lahaa is-afgarad guud oo ku saabsan hannaanka doorashooyinka, iyadoo la adkeynayo muhiimadda wada-hadal joogto ah oo u dhexeeya dhinacyada siyaasadda dalka.
Hay’addu waxay sidoo kale ku boorrisay dhammaan dhinacyada inay sii wadaan wada-xaajoodyada, si loo gaaro xal waara oo ku dhisan is-afgarad, loona xoojiyo xasilloonida siyaasadeed iyo dowlad-dhiska Soomaaliya.
Wada-hadalladan oo billowday 7-dii Luulyo ayaa loo arkaa tallaabo muhiim ah oo lagu yareynayo khilaafaadka siyaasadeed ee dalka. Dowladda Federaalka iyo mucaaradku waxay hore ugu heshiiyeen in la sii ambaqaado wada-hadallada, iyadoo dadaallada ay taageerayaan Dowladda Turkiga iyo beesha caalamka.
Kulamadan ayaa kusoo aadaya xilli Soomaaliya ay wajahaysa muran siyaasadeed oo la xiriira hannaanka doorashooyinka, iyadoo natiijooyinka kasoo baxa wada-hadalladan laga filayo inay saameyn ku yeeshaan jihada geeddi-socodka siyaasadeed iyo xasilloonida dalka.
