Dowladda Federaalka Soomaaliya ayaa soo dhaweysay go’aan uu Mareykanku dib uga laabtay qorshihii ahaa inuu joojiyo maalgelinta taageerada caalamiga ah ee ciidamada ka howlgala Soomaaliya.
Mareykanka ayaa sheegay inuu taageeri doono sii kordhinta hal sano ah ee howlaha xafiiska taageerada Qaramada Midoobay ee Soomaaliya (UNSOS) iyo howlgalka Midowga Afrika ee AUSSOM.
Afhayeen ka tirsan Waaxda Arrimaha Dibadda Mareykanka ayaa wakaaladda AFP u sheegay in Washington ay taageeri doonto sii kordhintaas.
Hase yeeshee afhayeenka ayaa ka digay “ballanqaadyo aan dhammaad lahayn,” wuxuuna Soomaaliya iyo Midowga Afrika ku booriyay inay dardar geliyaan qorshayaasha loogu gudbayo xal amni gobolleed oo waara.
Wasaaradda Gaashaandhigga Somaaliya ayaa war ay soo saartay ku sheegtay in go’aankani uu xaqiijinayo “iskaashiga joogtada ah” ee labada dal.
Wasaaraddu waxay Mareykanka ku tilmaantay “saaxiibka ugu weyn uguna adag” ee Somaaliya ee dagaalka ka dhanka ah Al-Shabaab.
Waxay sheegtay in taageeradu ay gacan ka geysan doonto ilaalinta guulaha dhowaan la gaaray, isla markaana ay u suurtagelin doonto ciidamada Soomaaliyeed inay amniga ku ballaariyaan deegaannada la xoreeyay.
Sidoo kale wasaaraddu waxay sheegtay in Somaaliya ay higsanayso inay mustaqbalka dhow la wareegto mas’uuliyadda koowaad ee amniga dalka.
Bishii Luulyo, Washington ayaa Midowga Afrika ku wargelisay inay qorsheyneyso joojinta maalgelinta UNSOS, isla markaana ay ka soo horjeeddo taageero kasta oo dheeraad ah kadib sannadka 2026.
Go’aankan cusub ayaa yimid xilli waqtiga howlgallada labada hay’adood uu ku eg yahay 31-ka Diseembar, iyadoo Golaha Ammaanka uu go’aan ka gaari doono sii kordhintooda.
Mareykanka ayaa ka mid ah deeq bixiyeyaasha ugu waaweyn ee howlgallada nabadda ee Soomaaliya. Wuxuu ku dhowaad 2 bilyan oo doollar ku bixiyay UNSOS iyo xafiiskii ka horreeyay, iyo qiyaastii 1.6 bilyan oo doollar dalalka ciidamada ku leh howlgalka.
Golaha Guud ee QM ayaa oggolaaday miisaaniyad dhan 481.4 milyan oo doollar oo loogu talagalay xafiiska taageerada ilaa Juun 2027.
Xafiiskaas ayaa taageero siin kara ilaa 20,900 askari oo Soomaaliyeed.
Go’aanka ayaa imanaya xilli Uganda, oo ah dalka ugu ciidamada badan AUSSOM, ay bilowday inay ciidamadeeda ka saarto Soomaaliya. Uganda ayaa horey u wareejisay shan saldhig oo ku yaallay Baraawe ee gobolka Shabeellaha Hoose.
Midowga Afrika iyo Midowga Yurub ayaa horraantii bishan ka digay in yaraanta maalgelinta ay dib u celin karto horumarka laga gaaray dagaalka Al-Shabaab.









