Wararka24: Madaxweynaha Mareykanka Donald Trump ayaa ku sugan xaalad caafimaad oo wanaagsan, sida lagu sheegay warqad uu soo saaray dhakhtarkiisa gaarka ah kadib baaritaan caafimaad oo lagu sameeyay Isbitaalka Militariga Qaranka ee Walter Reed.
Warqadda Aqalka Cad sii daayay, ayaa sheegtay in baaritaanka caafimaad uu ka koobnaa tijaabooyin iyo qiimeynno kala duwan oo lagu hubinayay caafimaadka guud, awoodda jireed iyo xaaladda garashada ee madaxweynaha.
Dhakhtarka Trump ayaa sheegay in madaxweynuhu muujiyay awood jireed iyo mid maskaxeed oo wanaagsan, isla markaana uu si buuxda ugu habboon yahay gudashada waajibaadka xilkiisa iyo hoggaaminta ciidamada Mareykanka.
Sidoo kale, warbixinta ayaa xustay in baaritaannada la xiriira garashada iyo shaqada maskaxda aysan muujin wax dhibaato ah, iyadoo lagu tilmaamay xaaladdiisa mid caadi ah.
Dhakhtarka ayaa sheegay in Trump uu sii wado qaadashada daawooyin lagu xakameeyo dufanka dhiigga iyo aspirin loo isticmaalo ka hortagga dhibaatooyinka wadnaha, isla markaana la siiyay talooyin ku saabsan cuntada, dhaqdhaqaaqa jirka iyo maaraynta miisaanka.
Trump, oo bishan June buuxinaya 80 sano, ayaa weli ah mid ka mid ah siyaasiyiinta ugu da’da weyn ee xilka madaxtinimada Mareykanka haya, taas oo sii kordhisay xiisaha dadweynaha ee la xiriira xaaladdiisa caafimaad.
Warbixinta caafimaadka ayaa sidoo kale xustay in xaalad hore oo la xiriirtay xididdada lugaha ay hadda tahay mid deggan, iyadoo la sheegay in calaamadihii lagu arkay lugaha ay ka soo raysanayaan.
Arrinta caafimaadka hoggaamiyeyaasha Mareykanka ayaa weli ah mowduuc si weyn looga doodo gudaha dalkaas, gaar ahaan marka la eego da’da sare ee qaar kamid ah siyaasiyiinta ugu sarreeya dalka.
