Wararka24: Dagaal culus ayaa saakay ka billowday magaalada Baydhabo ee xarunta gobolka Baay, kaas oo u dhexeeyay ciidamada dowladda Federaalka Soomaaliya iyo ciidamo taabacsan madaxweynihii hore ee Koonfur Galbeed, Cabdicasiis Xasan Maxamed Laftagareen.
Iska horimaadka ayaa ka dhacay gudaha magaalada iyo nawaaxigeeda, iyadoo rasaas xooggan laga maqlayay qeybo kala duwan oo Baydhabo ah. Dagaalka ayaa socday saacado, waxaana uu saameeyay qaar ka mid ah xaafadaha magaalada iyo fariisimo ay ciidamada dowladda ku sugnaayeen.
Ciidamada dowladda Federaalka ayaa sheegay inay iska caabiyeen weerar ay kusoo qaadeen ciidamo daacad u ah madaxweynihii hore ee Koonfur Galbeed, xilli xaaladda magaalada ay ahayd mid kacsan.
Dhinaca kale, maamulka Koonfur Galbeed ayaa sheegay in dagaalka lasoo afjaray, isla markaana laga adkaaday kooxihii ay ku tilmaameen “Khawaarij” ee weerarka kusoo qaaday magaalada Baydhabo.
Maamulka ayaa sidoo kale sheegay in shacabka loo soo bandhigi doono meydadka dad ay ku tilmaameen inay ka tirsanaayeen kooxihii weerarka qaaday, inkastoo faahfaahinta arrintaasi aysan weli si madax-bannaan u xaqiijin.
Shacabka magaalada Baydhabo ayaa loogu baaqay inay isdejiyaan, isla markaana ay la shaqeeyaan laamaha amniga ee ku howlan sugidda amniga iyo xaqiijinta xaaladda magaalada.
Dagaalkan ayaa kusoo beegmaya xilli Baydhabo ay ka taagneyd xiisad siyaasadeed iyo mid amni oo u dhexeysa dhinacyada isku haya maamulka Koonfur Galbeed, taas oo muddooyinkii dambe saameyn ku yeelatay xaaladda magaalada iyo nawaaxigeeda.
Ilaa hadda ma cadda khasaaraha dhabta ah ee ka dhashay dagaalka, iyadoo tirada dadka ku dhintay iyo kuwa ku dhaawacmay aan si madax-bannaan loo xaqiijin. Faahfaahin dheeraad ah ayaa laga filayaa dhinacyada ku lugta leh iyo ilo madax-bannaan.
