Wararka24: Wasiirka Gaashaandhigga Somaliland, Maxamed Yuusuf Cali, iyo wafdi uu hoggaaminayo ayaa booqasho ku tagay xarunta Taliska Ciidamada Mareykanka ee Afrika (AFRICOM) ee magaalada Stuttgart, dalka Jarmalka, halkaas oo ay kula yeesheen mas’uuliyiinta AFRICOM wada-hadallo la xiriira iskaashiga difaaca, amniga badda iyo xasilloonida Geeska Afrika.
Sida lagu sheegay war-saxaafadeed ay soo saartay Wasaaradda Gaashaandhigga Somaliland, wafdiga waxaa kamid ahaa Taliyaha Ciidanka Ilaalada Xeebaha Somaliland, Admiral Axmed Hurre Hariye, La-taliyaha Sare Faarax Axmed Xabuush iyo Cabdicasiis Axmed.
War-saxaafadeedka ayaa lagu sheegay in kulanka diiradda lagu saaray xoojinta xiriirka iskaashi ee u dhexeeya Somaliland iyo Mareykanka, iyadoo laga wada hadlay sidii loo ballaarin lahaa wada-shaqeynta dhinaca difaaca iyo horumarinta awoodda hay’adaha amniga.
Labada dhinac ayaa sidoo kale ka wada hadlay amniga marin-biyoodka Baab al-Mandab iyo Badda Cas, kuwaas oo ka mid ah marinnada ugu muhiimsan ee ganacsiga caalamiga ah. Wada-hadallada ayaa diiradda lagu saaray sidii loo xoojin lahaa iskaashiga la xiriira sugidda amniga badaha iyo la tacaalidda khataraha amni ee gobolka.
Sidoo kale, war-saxaafadeedka ayaa xusay in kulanka lagu falanqeeyay sidii loo xoojin lahaa nabadda iyo xasilloonida Geeska Afrika, iyadoo la isla eegay kor u qaadista awoodaha ciidamada iyo hay’adaha amniga si ay uga jawaabaan caqabadaha amni ee ka jira gobolka.
Wasaaradda Gaashaandhigga Somaliland ayaa sheegtay in kulanka lagu soo gabagabeeyay is-afgarad ku saabsan sii wadidda wada-shaqeynta dhinacyada difaaca, tababarrada iyo horumarinta awoodaha hay’adaha amniga. Waxay sidoo kale tilmaantay in wada-hadalladan ay qeyb ka yihiin dadaallada lagu xoojinayo iskaashiga amniga iyo sugidda amniga marin-biyoodka gobolka.
Ilaa iyo hadda, AFRICOM kama aysan soo saarin war rasmi ah oo faahfaahinaya natiijada kulanka ama qodobbadii sida rasmiga ah looga heshiiyay.
