Wararka24: Wasaaradda Awqaafta iyo Arrimaha Islaamka ee Dowladda Federaalka Soomaaliya ayaa soo saartay war-saxaafadeed ay ku shaacisay jadwalka iyo shuruudaha lagu maamulayo howlaha Xajka ee sanadka 1448H/2027. Wasaaraddu waxay ugu baaqday shirkadaha adeegga Xajka iyo xujeyda Soomaaliyeed inay si buuxda ugu hoggaansamaan nidaamka cusub ee loo dejiyay qabanqaabada Xajka.
Wasaaraddu waxay sheegtay in qorshahan lagu diyaariyay kaddib markii Dowladda Sacuudiga ay soo saartay jadwalka rasmiga ah ee howlaha Xajka, si loo dardargeliyo diyaarinta adeegyada loo fidinayo xujeyda Soomaaliyeed loona hubiyo in dhammaan howlaha ay ku socdaan waqtigooda.
Sida ku cad war-saxaafadeedka, muwaadiniinta doonaya inay gutaan waajibaadka Xajka waxaa lagu amray inay si degdeg ah isu diiwaangeliyaan, isla markaana baasaboorkooda iyo lacag hormaris ah oo dhan 2,000 oo doollar ku wareejiyaan shirkadaha adeegga Xajka ee ay Wasaaraddu siisay ruqsadda rasmiga ah.
Wasaaraddu waxay sidoo kale fartay shirkadaha adeegga Xajka inay bixiyaan adeegyo tayo leh oo ay ka mid yihiin gaadiid, hoy, cunto iyo daryeel caafimaad. Waxaa sidoo kale lagu amray inay la galaan xujeyda heshiisyo cad oo qeexaya xuquuqda iyo waajibaadka labada dhinac.
Dhanka kale, Wasaaraddu waxay sheegtay in bixinta adeegyada Xajka lagu maamuli doono nidaam elektaroonig ah (System), iyadoo shirkadaha laga doonayo inay xogta dhammaan xujeyda ku diiwaangeliyaan nidaamkaas si loo fududeeyo maamulka iyo dabagalka howlaha Xajka.
Ugu dambeyn, Wasaaradda Awqaafta iyo Arrimaha Islaamka ayaa uga digtay shacabka inay la macaamilaan shaqsiyaad ama shirkado aan haysan ruqsad rasmi ah. Waxay sidoo kale sheegtay in qiimaha rasmiga ah ee adeegyada Xajka la shaacin doono marka la soo gabagabeeyo daraasadda qiimeynta adeegyada Xajka ee sanadka 1448H/2027
