Madaxweynaha Turkiga, Recep Tayyip Erdoğan, ayaa u gudbiyay Baarlamaanka Turkiga codsi uu ku dalbanayo in laba sano lagu kordhiyo muddada ay ciidamada Turkigu ka howlgalayaan Soomaaliya, iyadoo lagu saleynayo heshiisyada iskaashiga difaaca ee u dhexeeya labada dal.
Qoraalka codsiga ayaa lagu sheegay in amniga iyo xasilloonida Soomaaliya ay muhiim u yihiin nabadda iyo amniga Geeska Afrika, isla markaana kordhinta muddada howlgalka ay u saamaxeyso ciidamada Turkiga inay sii wadaan taageerada ay siiyaan Dowladda Federaalka Soomaaliya ee la dagaallanka argagixisada iyo xoojinta awoodda ciidamada.
Dowladda Turkiga ayaa sheegtay inay tan iyo sanadkii 2011 sii ballaarinaysay xiriirka ay la leedahay Soomaaliya, iyadoo iskaashi ka sameysay dhinacyada siyaasadda, dhaqaalaha, amniga, waxbarashada iyo horumarinta adeegyada bulshada. Sidoo kale, ciidamada Turkiga ayaa sii waday tababarka, latalinta iyo taageerada farsamo ee ciidamada qalabka sida ee Soomaaliya.
Codsiga ayaa sidoo kale xusay in Dowladda Federaalka Soomaaliya ay Turkiga ka codsatay inuu sii wado taageeradiisa militari iyo iskaashiga difaaca, iyadoo lagu saleynayo heshiisyada labada dal ee dhinacyada amniga iyo difaaca. Turkigu wuxuu sheegay in taageeradaasi ay door muhiim ah ka qaadaneyso la dagaallanka argagixisada, burcad-badeedda, kalluumeysiga sharci darrada ah iyo khataraha kale ee amniga.
Qoraalka waxaa lagu sheegay in howlgalka Turkiga uu sidoo kale gacan ka geysanayo ilaalinta ammaanka marin-biyoodka muhiimka ah ee Gacanka Cadmeed, Badda Carabta iyo biyaha Soomaaliya, kuwaas oo muhiim u ah ganacsiga caalamiga ah iyo maraakiibta Turkiga.
Haddii Baarlamaanka Turkigu ansixiyo codsigan, muddada oggolaanshaha howlgalka ciidamada Turkiga ee Soomaaliya ayaa laba sano oo kale lagu kordhin doonaa marka uu dhammaado waqtiga hadda jira ee ku eg 27-ka Luulyo 2026.
Dowladda Turkiga ayaa sheegtay in tallaabadan ay qeyb ka tahay dadaallada lagu xoojinayo iskaashiga istaraatiijiga ah ee labada dal iyo taageerada joogtada ah ee lagu horumarinayo amniga iyo xasilloonida Soomaaliya.
