Wararka24: Mas’uuliyiin ka kala socday Turkiga, Soomaaliya iyo Boqortooyada Midowday (UK) ayaa kulan ka dhacay Aqalka Baarlamaanka UK uga wada hadlay sidii loo xoojin lahaa iskaashi saddex geesood ah oo lagu taageerayo amniga, horumarinta iyo koboca dhaqaalaha Soomaaliya iyo guud ahaan Geeska Afrika.
Kulanka ayaa diiradda lagu saaray doorka iskaashiga istaraatiijiga ah ee u dhexeeya Soomaaliya, Turkiga iyo UK, iyadoo la sheegay in xiriirka muddada dheer ee Ankara iyo Muqdisho uu saldhig u noqon karo wada-shaqeyn ballaaran oo ay London qeyb ka noqoto.
Danjiraha Turkiga ee UK, Cismaan Koray Ertaş, ayaa sheegay in xiriirka Turkiga iyo Soomaaliya uu ka gudbay heer gargaar bani’aadamnimo, isla markaana uu isu beddelay iskaashi dhinacyada horumarinta, amniga iyo maalgashiga. Wuxuu xusay in Turkigu tan iyo sanadkii 2011 ka hirgeliyay Soomaaliya mashaariic horumarineed oo ka badan hal bilyan oo doollar, isla markaana uu tababar siiyay in ka badan 20,000 oo ka tirsan ciidamada ammaanka Soomaaliya.
Ertaş ayaa sidoo kale sheegay in Soomaaliya ay gaartay horumar muuqda inkastoo ay weli wajahdo caqabado amni iyo kuwo horumarineed. Wuxuu carrabka ku adkeeyay in Turkigu uu soo dhoweynayo taageerada caalamiga ah, gaar ahaan tan UK, isagoo sheegay in Ankara ay doorbideyso iskaashi ku dhisan is-aaminaad iyo wada-shaqeyn.
Danjiraha Soomaaliya ee UK, Cabdulqaadir Xaashi, ayaa sheegay in Soomaaliya ay u gudbeyso marxalad cusub oo diiradda lagu saarayo horumar iyo maalgashi, halkii ay ku tiirsanaan lahayd gargaar. Wuxuu sheegay in iskaashi dhow oo dhex mara Soomaaliya, Turkiga iyo UK uu abuuri karo fursado cusub oo lagu xoojinayo xasilloonida iyo koboca dhaqaalaha Geeska Afrika.
Guddoomiyaha kulanka, Xildhibaanka Baarlamaanka UK ee xisbiga Labour, Afzal Khan, ayaa sheegay in Soomaaliya iyo Turkigu ay yihiin laba saaxiib oo muhiim u ah UK. Wuxuu ku baaqay in la xoojiyo maalgashiga iyo iskaashiga waara, isagoo xusay in xasilloonida Soomaaliya ay muhiim u tahay amniga iyo horumarka gobolka iyo caalamkaba.
