Wararka24: Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa maanta xarigga ka jaray xarunta cusub ee Taliska Guutada 77 ee Madaxtooyada Qaranka, kadib munaasabad ka dhacday Villa Soomaaliya.
Madaxweynaha ayaa munaasabadda ka hor salaan sharaf ka qaatay cutubyo ka tirsan Ciidanka Ilaalada Madaxtooyada iyo saraakiil ciidan oo goobta ku sugnaa. Waxaa booqashada ku weheliyay Taliyaha Ciidanka Xoogga Dalka iyo Taliyaha Guutada 77.
Xasan Sheekh ayaa bogaadiyay dhismaha xaruntan cusub, isagoo sheegay inay door muhiim ah ka qaadan doonto tayeynta shaqada Guutada 77 iyo kor u qaadidda awoodda ciidamada ee la xiriirta ilaalinta Madaxtooyada iyo madaxda qaranka.
Intii uu ku guda jiray booqashada, Madaxweynaha iyo saraakiisha la socotay ayaa kormeer ku sameeyay xarunta cusub iyo xafiisyada loo dhisay saraakiisha, kuwaas oo lagu sameeyay dib u habeyn iyo qalabeyn lagu horumarinayo habsami u socodka howlaha ciidanka.
Madaxweynaha ayaa sidoo kale booqday askar ka tirsan Ciidanka Xoogga Dalka oo ku dhaawacmay howlgalada ka dhanka ah Al-Shabaab. Wuxuu xaaladooda caafimaad ka wareystay, isagoo ku ammaanay geesinimada iyo naf-hurnimada ay u muujiyeen difaaca dalka.
Furitaanka xaruntan cusub ayaa qeyb ka ah dadaallada dowladda ee lagu xoojinayo dib u dhiska iyo casriyeynta ciidamada qalabka sida. Dowladda Federaalka ayaa muddooyinkii u dambeeyay kordhisay qorshayaasha lagu tayeynayo ciidamada iyo kaabeyaasha ay ku shaqeeyaan.
Arrintan ayaa kusoo aadeysa iyadoo dowladda ay sii waddo howlgalada ka dhanka ah Al-Shabaab ee ka socda gobollo kala duwan, isla markaana ay adkeyneyso dadaallada lagu xoojinayo amniga iyo dib u dhiska hay’adaha difaaca qaranka.
