Wararka24: In ka badan 13,000 oo muhaajiriin Afrikaan ah ayaa gaaray Yemen intii lagu jiray bishii Juun 2026, taas oo ka dhigan koror boqolkiiba 15 ah marka loo eego bishii May, sida lagu sheegay warbixin ay soo saartay Hay’adda Caalamiga ah ee Socdaalka (IOM).
Sida warbixinta lagu xusay, 13,339 muhaajiriin ayaa galay Yemen muddadii u dhexeysay 1-da ilaa 30-ka Juun, halka bishii May ay tiradu ahayd 11,587 qof. Hay’adda Caalamiga ah ee Socdaalka (IOM) ayaa sheegtay in kororkan uu muujinayo sii socoshada qulqulka dadka tahriibka ah ee u kala goosha Geeska Afrika iyo Jasiiradda Carabta.
Hay’addu waxay tilmaantay in qiyaastii 80% dadka yimid Yemen ay ka soo ambabaxeen Jabuuti, halka 20% ay ka yimaadeen Soomaaliya. Muhaajiriinta ka baxay Jabuuti ayaa intooda badan gaaray gobolka Abyan, halka kuwii ka soo baxay Soomaaliya ay wada gaareen gobolka Shabwah.
IOM ayaa sheegtay in kororka socdaalka bishii Juun uu la xiriiro hakad ku yimid ololeyaashii amniga ee lagu bartilmaameedsanayay shabakadaha tahriibinta, taas oo sahashay dhaqdhaqaaqa tahriibiyeyaasha iyo kordhinta tirada dadka u gudbaya Yemen.
Dhanka kale, warbixintu waxay xustay in dowladda Cumaan ay bishii Juun dib ugu celisay gobolka Al-Mahra ee bariga Yemen ku dhowaad 400 muhaajiriin Itoobiyaan ah oo si sharci darro ah ugu sugnaa dalkeeda. Sidoo kale, 1,473 muwaadiniin Itoobiyaan ah ayaa ka baxay Yemen muddadaas, iyadoo intooda badan ay dib ugu laabteen Jabuuti, halka tiro kalena ay u gudbeen Cumaan.
IOM ayaa mar kale ka digtay halista ay wajahayaan dadka isticmaala marinada tahriibka, iyadoo Yemen ay weli tahay marin muhiim u ah muhaajiriinta ka imanaya Geeska Afrika inkastoo ay dalkaasi ka jiraan colaado iyo xaalad bani’aadamnimo oo adag. Hay’addu waxay ku baaqday in la xoojiyo dadaallada lagu ilaalinayo badqabka muhaajiriinta iyo la dagaallanka shabakadaha tahriibinta dadka.
