Madaxweynaha Mareykanka, Donald Trump, ayaa lagu warramayaa inuu diyaar u yahay in Turkiga dib loogu soo celiyo barnaamijka diyaaradaha dagaalka ee F-35, kadib sanado ay Ankara ka maqneyd mashruucaas sababo la xiriiray khilaaf dhinaca amniga ah.
Warbixin uu daabacay wargeyska New York Times ayaa lagu sheegay in Trump uu qorsheynayo inuu arrintan kala hadlo Madaxweynaha Turkiga, Recep Tayyip Erdogan, xilli uu ku sii jeedo Ankara si uu uga qayb-galo shir ay yeelanayaan hoggaamiyeyaasha dalalka xubnaha ka ah NATO.
Sida ay warbixintu xustay, Trump ayaa lagu wadaa inuu Erdogan u gudbiyo farriin muujinaysa inuu taageersan yahay in Turkiga mar kale ka faa’iideysto barnaamijka diyaaradaha casriga ah ee F-35, kuwaas oo Ankara laga joojiyay sannadkii 2019-kii.
Xiriirka u dhexeeya Mareykanka iyo Turkiga ayaa xumaaday kadib markii Ankara ay Ruushka ka iibsatay nidaamka difaaca hawada ee S-400, taas oo keentay in Washington ay cunaqabateyn kusoo rogto Turkiga isla markaana ay ka saarto mashruuca F-35.
Dowladda Mareykanka ayaa xilligaas ku dooday in nidaamka S-400 uu halis ku yahay tiknoolajiyadda iyo xogaha xasaasiga ah ee la xiriira diyaaradaha F-35. Sidoo kale, Congress-ka Mareykanka ayaa meel mariyay sharci mamnuucaya in Turkiga laga iibiyo diyaaradahaas inta uu sii haysto nidaamka difaaca ee Ruushka.
Wararka hadda soo baxaya ayaa muujinaya in laga yaabo inuu jiro isbeddel cusub oo ku yimid xiriirka labada dal, gaar ahaan tan iyo markii Trump uu dib ugu soo laabtay Aqalka Cad. Waxaa sidoo kale dhawaan la sheegay in maamulka Mareykanka uu Congress-ka ku wargeliyay qorshe ku saabsan iibinta matoorro diyaaradeed oo qiimahoodu ka badan yahay 700 milyan oo doollar.
Haddii tallaabadan ay hirgasho, waxay noqon kartaa isbeddel muhiim ah oo saameyn ku yeesha xiriirka istaraatiijiga ah ee u dhexeeya Ankara iyo Washington.
