Wararka24: Ugu yaraan 50 muhaajiriin ah, oo ay ku jiraan haween iyo carruur, ayaa la rumeysan yahay inay ku dhinteen ama lagu la’yahay badda Mediterranean-ka kadib markii doon alwaax ah oo ay saarnaayeen ay ku degtay meel ka baxsan xeebaha bari ee Liibiya.
Sida ay ilo amni u sheegeen Reuters, 10 qof ayaa laga soo badbaadiyay shilka. Dadkaas ayaa laga helay agagaarka jasiiradda El-Bardaa oo qiyaastii 70 kiiloomitir dhanka galbeed kaga beegan magaalada Tobruk, una dhow xadka Masar.
Dadka badbaaday ayaa sheegay in doonta ay saarnaayeen ku dhowaad 60 muhaajiriin ah oo kasoo jeeday dalal kala duwan oo ku yaalla Afrika. Waxay sheegeen in safarkoda badda ay billabeen aroortii hore, ka hor inta aysan doontu degin.
Liibiya ayaa weli ah marin muhiim u ah muhaajiriinta isku daya inay gaaraan Yurub, iyagoo ka tallaabaya saxaraha iyo badda Mediterranean-ka. Hay’adaha caalamiga ah ayaa marar badan ka digay halista safarradaasi, kuwaas oo sannad kasta sababa dhimasho iyo dad badan oo lagu la’yahay badda.
Dhacdo kale oo ka dhacday isla gobolka, kooxaha gurmadka ee magaalada Tobruk ayaa Isniintii soo saaray meydadka afar muhaajiriin ah, halka ay badbaadiyeen 24 kale kadib markii doontoodii ay laba toddobaad ku dhex sabeynaysay biyaha Liibiya.
Mas’uuliyiinta ayaa sheegay in afarta qof ay u geeriyoodeen duruufihii adkaa ee ay kala kulmeen safarka badda, halka dadka la badbaadiyay loo qaaday isbitaallo si loo siiyo daryeel caafimaad. Bishii Juun, sidoo kale waxaa xeebaha Tobruk laga soo saaray meydadka ku dhowaad 26 muhaajiriin ah kadib markii doon kale ay ku degtay meel u dhow magaalada.
