Wasaaradda Gaashaandhigga Soomaaliya ayaa sheegtay in Ciidanka Xoogga Dalka Soomaaliyeed, oo kaashanaya saaxiibada caalamka, ay duqeyn ka fuliyeen deegaanka Goobo oo qiyaastii 10 kiiloomitir waqooyi kaga beegan degmada Maxaas ee gobolka Hiiraan. Dowladda ayaa sheegtay in goobta la beegsaday ay Al-Shabaab ka waday abaabul dagaal.
Warsaxaafadeedka Wasaaradda ayaa lagu sheegay in duqeynta, oo dhacday fiidnimadii xalay, lagu dilay 42 dagaalame oo ka tirsanaa Al-Shabaab, halka 12 kale lagu dhaawacay. Dowladda ayaa sidoo kale sheegtay in howlgalka lagu burburiyay gaari dagaal iyo fariisimo ay kooxda ku lahayd deegaanka.
Sida lagu sheegay bayaanka, duqeyntu waxay daba socotay dagaallo ka dhacay deegaannada Sullaay iyo Waab-weyn ee gobolka Hiiraan, halkaas oo dowladda ay sheegtay in ciidamada ay guulo ka gaareen howlgallada ka dhanka ah Al-Shabaab.
Howlgallada ka socda gobolka Hiiraan ayaa qayb ka ah guluf ay iska kaashanayaan Ciidanka Xoogga Dalka iyo ciidamada deegaanka ee Macawiisleyda, kuwaas oo dowladda sheegtay inay ku doonayaan inay dib uga riixaan Al-Shabaab deegaannada ay kaga sugan yihiin gobolka.
Wasaaradda Gaashaandhigga ayaa ku ammaantay Ciidanka Xoogga Dalka iyo Macawiisleyda doorka ay ka qaadanayaan howlgalada ka dhanka ah Al-Shabaab. Waxay sidoo kale u mahadcelisay saaxiibada caalamka ee Soomaaliya ka taageera howlgalada amniga iyo la dagaallanka argagixisada.
Dowladda Federaalka Soomaaliya ayaa sheegtay in howlgalada ka dhanka ah Al-Shabaab ay sii socon doonaan, iyadoo xustay in ciidamada ay sii wadi doonaan beegsiga fariisimaha iyo horjoogayaasha kooxda. Dhanka kale, ma jirto war madax-bannaan oo si rasmi ah u xaqiijinaya tirada khasaaraha ee ay dowladda sheegtay inay ka dhalatay duqeyntan.
