Wararka24: Dowladda Mareykanka ayaa markii ugu horreysay ka hadashay dhacdadii lagu arkay shaqsiyaad xiran dareyska Ciidamada Qalabka Sida Soomaaliya oo ku xadgudbaya calanka Mareykanka, iyadoo soo dhaweysay tallaabada ay Dowladda Federaalka Soomaaliya uga falcelisay arrintaas.
Bayaan ay soo saartay Safaaradda Mareykanka ee Muqdisho ayaa lagu bogaadiyay dowladda Soomaaliya sida degdegga ah ee ay u baartey dhacdada isla markaana u soo xirtay dadka looga shakisan yahay inay ku lug lahaayeen falkaasi.
Safaaraddu waxay sheegtay in dadka isku dayaya inay dhaawacaan xiriirka u dhexeeya Soomaaliya iyo Mareykanka ay waxyeello u geysanayaan danaha shacabka Soomaaliyeed, iyadoo carrabka ku adkeysay in cid kasta oo ku lug leh falalkaas lala xisaabtamo.
Mareykanka ayaa sidoo kale xusay in uu muddo dheer taageero dhinacyo badan ah siiyay Soomaaliya, gaar ahaan dib u dhiska hay’adaha amniga iyo tayeynta Ciidamada Qalabka Sida, isagoo adkeeyay muhiimadda ay leedahay ilaalinta iskaashiga labada dal.
Dhanka kale, Dowladda Federaalka Soomaaliya ayaa maanta soo bandhigtay afar eedeysane oo loo haysto inay ku lug lahaayeen falka lagu xadgudbay calanka Mareykanka. Wasaaradda Gaashaandhigga ayaa sheegtay in dhammaan eedeysanayaashu ay ku jiraan gacanta dowladda, isla markaana lagu wado in la marsiiyo tallaabooyin waafaqsan sharciga.
Wasaaraddu waxay mar kale caddeysay in aan loo dulqaadan doonin fal kasta oo dhaawacaya sharafta Ciidamada Qalabka Sida ama saameyn ku yeelan kara xiriirka Soomaaliya ay la leedahay dalalka saaxiibka la ah, iyadoo sheegtay in baaritaannada la xiriira dhacdada ay weli socdaan.
