Wararka24: Wasaaradda Gaashaandhigga Dowladda Federaalka Soomaaliya ayaa sheegtay in la xiray askar lagu eedeeyay inay ku lug lahaayeen fal la xiriirta muuqaal lagu baahiyay baraha bulshada oo muujinayo askar la sheegay inay ka tirsan Ciidanka Xoogga Dalka oo ku xadgudbaya calanka Mareykanka, kadib markii muuqaal muujiyay shaqsiyaad ku labisan dareyska Ciidanka Xoogga Dalka oo ku istaagaya calanka.
Warsaxaafadeed ay soo saartay wasaaraddu ayaa lagu sheegay in falkaasi uu si cad uga hor imaanayo qiyamka, anshaxa iyo xirfadda Ciidanka Xoogga Dalka Soomaaliyeed, isla markaana uusan ka tarjumayn mowqifka Dowladda Federaalka Soomaaliya ama Wasaaradda Gaashaandhigga.
Wasaaraddu waxay xaqiijisay in dadka lagu tuhunsan yahay dhacdada la xiray, islamarkaana ay socdaan baaritaanno lagu ogaanayo sida ay wax u dhaceen iyo tallaabooyinka sharci iyo anshax ee laga qaadi doono.
Sidoo kale, wasaaraddu waxay caddeysay inay ka go’an tahay ilaalinta nidaamka iyo anshaxa ciidamada, iyadoo sheegtay in aan loo dulqaadan doonin fal kasta oo dhaawici kara sumcadda ciidamada ama xiriirka Soomaaliya ay la leedahay dalalka saaxiibka la ah.
Dowladda Federaalka ayaa mar kale muujisay inay qiimeyn weyn u hayso iskaashiga amniga ee kala dhexeeya Mareykanka, kaas oo ay sheegtay inuu door muhiim ah ka qaatay taageerada howlgalada ka dhanka ah Al-Shabaab iyo Daacish, iyo sidoo kale horumarinta hay’adaha amniga Soomaaliya.
Gunaanadkii bayaanka, Wasaaradda Gaashaandhigga ayaa xustay inay ixtiraam u hayso shacabka iyo calanka Mareykanka, isla markaana ay ka go’an tahay sii xoojinta xiriirka iyo iskaashiga istaraatiijiga ah ee u dhexeeya Muqdisho iyo Washington.
