Wararka24: Dhaqdhaqaaqii ganacsi ee dekedda Boosaaso ayaa hakad galay maalintii tobnaad, kadib muran ka dhashay khidmadaha cusub ee ay Dowladda Puntland iyo shirkadda DP World ku soo rogeen adeegyada dekedda.
Ganacsatada Boosaaso ayaa sheegay inaysan diidnayn bixinta canshuuraha waajibka ah, balse ay ka cabanayaan lacagaha dheeraadka ah ee lagu kordhiyay adeegyada dekedda xilli ay jiraan sicir-barar, abaaro iyo hoos u dhac dhaqaale. Waxay sheegeen in khidmadaha cusub ay culays ku noqonayaan ganacsiga iyo macaamiisha.
Jaamac Hurre, oo ka mid ah ganacsatada Boosaaso, ayaa sheegay in shaqo joojinta dekeddu ay hakisay isu socodkii badeecadaha, isla markaana suuqyada magaalada qaarkood ay albaabada u xirteen si ay u muujiyaan taageerada cabashada ganacsatada. Wuxuu ka digay in haddii aan xal degdeg ah la helin ay mudaharaadyadu ku fidi karaan deegaanno kale.
Ganacsatadu waxay sheegeen inay dhowr jeer wada hadal la yeesheen Dowladda Puntland, balse aan weli lagu guuleysan in heshiis laga gaaro muranka. Waxay ugu baaqeen maamulka Puntland inuu bilaabo wadaxaajood miro-dhal ah si dib loogu furo dekedda loona soo afjaro khilaafka.
Dhankiisa, Wasiir Ku-xigeenka Wasaaradda Maaliyadda Puntland, Axmed Yaasiin Saalax, ayaa difaacay hirgelinta khidmadaha cusub, isagoo sheegay inay qayb ka yihiin heshiiska horumarinta iyo casriyeynta dekedda Boosaaso. Wuxuu xusay in dowladda ay muddo laba sano iyo bar ah dib u dhigtay dhaqangelinta kordhinta si loo tixgeliyo duruufaha ganacsatada.
Sida uu sheegay wasiir ku xigeenku, wajigii koowaad ee mashruuca horumarinta dekedda ayaa la dhammaystiray sannadkii 2023, waxaana ka mid ahaa ballaarinta dekedda, dayactirka qaybihii hore, casriyeynta qalabka iyo hagaajinta adeegyada dekedda. Dowladda ayaa sidoo kale qorsheynaysa wajiga labaad oo ay ku jiraan dhismaha terminal cusub iyo marin gaar ah oo loogu talagalay dhoofinta xoolaha.
Mas’uuliyiinta Puntland ayaa ku baaqay in ganacsatadu ay qaataan nidaamka cusub ee khidmadaha, iyagoo sheegay in dakhliga laga helo uu muhiim u yahay sii wadista horumarinta kaabayaasha dekedda.
Dhanka kale, ganacsatada ayaa ku adkeysanaya in xal lagu gaaro wadahadal si looga fogaado saameyn dhaqaale oo sii ballaarata, maadaama xirnaanshaha dekeddu uu keeni karo kororka qiimaha badeecadaha iyo yaraanshaha sahayda gaarta Boosaaso iyo deegaannada ku tiirsan dekedda.
