Raysal Wasaaraha Israel, Benjamin Netanyahu, ayaa sheegay in uu amray duqaymihii xalay ee gilgilay Marinka Gaza, isagoo tilmaamay inay sabab u noqotay horumar la’aanta wada hadalada u dhexeeya Israel iyo Xamaas.
Netanyahu ayaa ku hanjabay in Israel ay qaadi doonto tallaabooyin ka dhan ah Xamaas. “Wixii hadda ka dambeeya, Israel waxay qaadi doontaa tallaabooyin ka dhan ah Xamaas, iyadoo kordhineysa hawlgalada militariga,” ayuu ku sheegay war saaka ka soo baxay xafiiskiisa.
Wasiirka Difaaca Israel, Israel Katz, ayaa dhankiisa ku hanjabay in ay awood u adeegsan doonaan sidii maxaabiista Israeliyiinta ee lagu haysto gudaha Gaza ay dib ugu soo celin lahaayeen guryahooda.
Netanyahu iyo Wasiirkiisa Difaaca ayaa si isku mid ah ugu eedeeyay Xamaas inay diidan tahay in la kordhiyo wejigii koowaad ee heshiiskii xabad joojinta ee dhammaaday 1-dii bishan.
Wada hadaladii ugu dambeeyay ee toddobaadkii hore ka qabsoomay dalka Qatar ayaa waxaa hareeyay is mari-waa soo jiitamayay toddobaadyadan. Labada dhinac ayaa 15-kii bishii January ku heshiiyay saddex weji oo heshiis ah, oo wejigiisii koowaadna uu soconayo lix toddobaad oo ka bilaabanayay 19-kii January.
Marxaladda labaadna ay Israel ciidamadeeda kala wada baxeyso Marinka Gaza. Muddadii uu socday wejiga koowaad ayay labada dhinac isku dhaafsadeen maxaabiis badan.
Israel ayaa dalbatay in la kordhiyo waqtiga xabad joojinta ee wejiga koowaad, lana sii wado is dhaafsiga maxaabiista, halka Xamaas ay ku adkeysatay in loo gudbo marxaladda labaad, sida ku cad is afgaradkoodii hore.
Sababta Netanyahu u diidan yahay wejiga labaad ee wada hadalada Israel iyo Xamaas
Sababta ay Israel u diidan tahay in ay gasho wejiga labaad ee heshiiska, waa iyadoo ka carareyso in ciidamadeeda ay kala baxdo meelaha ay haatan ka joogaan Marinka Gaza. Tani waa sababta ay u dalbaneyso in la kordhiyo xabad joojintii jilicsaneyd ee Gaza ka jirtay.
Marxaladda labaad ayaa horseedeysa in la soo afjaro colaadda Gaza, ka dib wax ka badan 15 bilood oo dagaal lagu riiqmay ah. Labada dhinac ayaana isku khilaafsan, halka looga dhaqaaqayo isgoyska la taagan yahay.
Diidmada bilowgii ka timid dhinaca Israel ee ku saabsaneyd inaysan geli doonin wejiga labaad ee heshiiska ayaa noqotay caqabadda ugu weyn ee soo food saartay heshiiska.
Tallaabada ugu dambeysay iyo saamaynta Gaza
Israel ayaa 2-dii bishan dib u soo celisay xanibaaddii ay ku haysay qulqulka gargaarka bani’aadantinimo ee Gaza, waxaana xigay korontada oo ay ka jirtay dhulka go’doonsan.
Tallaabadii ugu dambeysay ay Israel xalay dib ugu bilowday weeraradeedii aan kala sooca lahayn ee dadka Gaza ayaa calaamad u ah in Tel Aviv ay burburisay heshiiskii halka lug ku taagnaa. Weeraradan ayaa soo afjaray ku dhawaad laba bilood oo deganaansho ay ka jirtay Marinka Gaza.
Dadka reer Gaza ayaa u muuqdo in ay ku laabanayaan waqtigii adkaa ee colaadda, iyadoo lagu guda jiro tobanka dhexe ee bisha barakaysan ee Ramadan.
Xamaas waxay sheegtay in ay diyaar u tahay in heshiiska uu sii shaqeeyo, haddii Netanyahu uu dhankiisa diyaar u yahay in uu aqbalo in loo gudbo wejiga labaad, si loo xaqiijiyo hirgelinta is fahamkii hore ee la gaaray.
📌 Wararka24 – Xog rasmi ah oo faahfaahin degdeg ah
