Wararka24: Dowladda Federaalka Soomaaliya ayaa si rasmi ah u soo dhoweysay go’aanka Qaramada Midoobay ee Ururka Ahlu Sunna Waljamaaca looga saaray liiska kooxaha lagu eedeeyo xadgudubyada carruurta xilliyada colaadaha hubeysan.
Warbixinta sannadlaha ah ee Qaramada Midoobay ee ku saabsan carruurta iyo colaadaha hubeysan ayaa xaqiijisay in Ahlu Sunna Waljamaaca aan hadda loo aqoonsanayn koox hubeysan oo madax-bannaan, kaddib markii xubnaheeda lagu daray hay’adaha amniga Qaranka Soomaaliyeed.
Wasaaradda Gaashaandhigga Soomaaliya ayaa sheegtay in go’aankan uu ka dhashay geeddi-socod dheer oo isugu jiray qiimeyn, xog uruurin, xaqiijin iyo wada-tashiyo ay ka qeyb qaateen hay’adaha dowladda, dowlad-goboleedyada, Qaramada Midoobay iyo saaxiibbada caalamiga ah.
Wasaaraddu waxay tilmaantay in tallaabadan ay muujinayso horumarka laga gaaray dib-u-habeynta hay’adaha amniga, xoojinta dowladnimada iyo hirgelinta waajibaadka la xiriira ilaalinta carruurta iyo rayidka.
Sidoo kale, wasaaraddu waxay sheegtay inay hormuud ka ahayd dadaalladii farsamo ee lagu xaqiijiyay xaaladda Ahlu Sunna Waljamaaca, iyadoo codsi rasmi ah u gudbisay Qaramada Midoobay si loo waafajiyo qiimeynta caalamiga ah iyo xaqiiqooyinka ka jira Soomaaliya.
Dowladda Federaalka Soomaaliya ayaa uga mahadcelisay Qaramada Midoobay, UNICEF, dowlad-goboleedyada xubnaha ka ah dowladda federaalka, gaar ahaan Galmudug, iyo dhammaan saaxiibbada caalamiga ah taageerada ay ka geysteen arrintan.
Ugu dambeyn, dowladda Soomaaliya ayaa markale caddeysay sida ay uga go’an tahay ilaalinta carruurta, dhowrista xuquuqda aadanaha, hirgelinta siyaasadaha ilaalinta rayidka iyo dhismaha hay’ado amni oo waafaqsan heerarka caalamiga ah.
