Wararka24: Madaxweynaha Soomaaliya Xasan Sheekh Maxamuud ayaa faahfaahin ka bixiyay mowqifka dowladda federaalka ee ku aaddan Israel iyo arrinta Somaliland, isaga oo sheegay in tallaabooyinka la xiriira aqoonsiga Somaliland aysan waxba ka beddeleyn aragtida Soomaaliya ee midnimada dalka.
Wareysi uu bixiyay madaxweynaha ayaas sheegay in dowladda Soomaaliya ay weli ku adkeysaneyso ilaalinta midnimada iyo wadajirka dhulka Soomaaliyeed. Wuxuu tilmaamay in arrinta Somaliland ay tahay mid lagu xallin karo wada-hadal iyo is-afgarad siyaasadeed.
Xasan Sheekh ayaa sidoo kale shaaciyay kahor aqonsiga in Israel ay marar kala duwan xiriir la soo sameysay dowladda Soomaaliya, isla markaana ay jireen codsiyo ku saabsan in labada dhinac yeeshaan xiriir diblomaasiyadeed. Si kastaba, wuxuu sheegay in Soomaaliya aysan aqbalin codsiyadaas, iyadoo ku saleyneysa mowqifkeeda siyaasadeed iyo arrimo la xiriira xaaladda Bariga Dhexe.
Madaxweynaha ayaa xusay in Soomaaliya ay aaminsan tahay in xal kasta oo ku saabsan Somaliland uu ku imani kara wada-hadal dhex mara Soomaalida, halkii lagu raadin lahaa waddooyin kale oo sii adkeyn kara khilaafaadka jira.
Dhanka kale, wuxuu sheegay in aqoonsi kasta oo ay bixiyaan dalal shisheeye uusan waxba ka beddeli karin mowqifka dowladda federaalka iyo kan inta badan beesha caalamka ee ku aaddan midnimada Soomaaliya. Wuxuu ku celiyay in dowladda ay sii wadi doonto dadaallada diblomaasiyadeed ee lagu difaacayo madax-bannaanida iyo wadajirka dalka.
Hadalladan ayaa kusoo aadaya xilli ay sii socdaan doodaha la xiriira mustaqbalka Somaliland iyo saameynta ay yeelan karaan tallaabooyinka diblomaasiyadeed ee gobolka. Arrintan ayaa sidoo kale soo jiidatay indhaha dalalka gobolka iyo ururrada caalamiga ah ee la socda xaaladda Geeska Afrika.
Madaxweynaha ayaa ugu dambeyn sheegay in Soomaaliya aysan dooneyn in lagu dhex jiido loollan siyaasadeed ama dano istaraatiiji ah oo dibadda ka imanaya, isagoo carrabka ku adkeeyay in dowladda federaalka ay sii wadi doonto difaaca midnimada iyo madaxbannaanida dalka.
