Wararka24: Madaxweynaha Jamhuuriyadda Federaalka Soomaaliya Xasan Sheekh Maxamuud ayaa sheegay in khilaafka siyaasadeed ee u dhexeeya dowladda iyo mucaaradka uu salka ku hayo arrimaha doorashooyinka iyo hannaanka xisbiyada siyaasadeed ee dalka.
Wareysi uu siiyay barnaamijka Miisaan Podcast, ayuu madaxweynuhu ku sheegay in dowladda federaalka ay ka go’an tahay hirgelinta doorasho qof iyo cod ah iyo dhismaha nidaam siyaasadeed oo ku saleysan xisbiyo rasmi ah, isagoo sheegay in labadaas qodob ay yihiin tiirarka muhiimka u ah geeddi-socodka dimuqraadiyadda Soomaaliya.
Madaxweyne Xasan Sheekh ayaa ku eedeeyay siyaasiyiinta mucaaradka inay doonayaan in dalka uu ku sii socdo nidaamkii hore ee doorashooyinka dadban, halka dowladda ay qorsheyneyso in shacabka Soomaaliyeed ay si toos ah u doortaan hoggaankooda.
Sidoo kale wuxuu sheegay in dowladda ay doonayso in siyaasadda dalka laga wareejiyo nidaam ku dhisan shaqsiyaad iyo isbahaysiyo ku meel gaar ah, loona gudbo nidaam ay hoggaaminayaan xisbiyo siyaasadeed oo sharciyeysan. Sida uu sheegay, xisbiyadu waxay muhiim u yihiin isla xisaabtanka, tartanka siyaasadeed iyo xoojinta dimuqraadiyadda.
Madaxweynaha ayaa xusay in marar badan uu mucaaradka ka codsaday inay soo bandhigaan qorshe ama aragti kale oo lagu beddeli karo qorshaha dowladda, balse uu sheegay in aan weli la helin soo-jeedin cad oo beddel u noqon karta hannaanka hadda la wado.
Dhanka kale, Xasan Sheekh ayaa si cad u diiday baaqyada ku saabsan in dib loogu laabto Dastuurkii Ku-meelgaarka ahaa ee la ansixiyay sanadkii 2012. Wuxuu sheegay in dastuurkaasi uu qayb ka yahay taariikhda dowlad-dhiska Soomaaliya, balse aanay suurtagal ahayn in dib loogu noqdo sidii uu markaas ahaa.
Madaxweynaha ayaa sheegay in dowladda hadda jirta aysan sameyn dastuur cusub, balse ay waddo dhameystirka dib-u-eegista dastuurka oo hore loogu waajibiyay hay’adaha dowladda. Wuxuu tilmaamay in baarlamaannadii hore dhowr jeer dib u dhigeen hawshaas, halka dowladda hadda jirta ay go’aansatay in aan mar kale dib loo dhigin.
Sidoo kale wuxuu adkeeyay in qof kasta oo qaba cabasho ama aragti ka duwan tan dowladda uu soo bandhigi karo qodobada uu diidan yahay iyo sababaha sharciyeed ee ku kalifaya mowqifkaas. Madaxweynaha ayaa ugu dambeyn sheegay in dastuurka hadda jira lagu sameyn karo wax-ka-beddel iyo sixitaan iyadoo la raacayo habraacyada sharciyeed ee ku xusan dastuurka laftiisa.
