Wararka24: Dowladda Itoobiya ayaa sheegtay in xoogag ka tirsan Jabhadda Xoreynta Shacabka Tigray (TPLF) ay isku diyaarinayaan weerar cusub oo ka dhan ah dowladda federaalka, arrintaas oo sare u qaaday walaaca laga qabo in dalka uu dib ugu laabto colaaddii baaxadda lahayd ee dhawaan la soo afjaray.
Mas’uuliyiin sare oo ka tirsan dowladda Itoobiya ayaa sheegay in garab mayal adag oo ka tirsan TPLF uu qorsheynayo inuu maalmaha soo socda bilaabo dagaal cusub. Dowladda ayaa sidoo kale ku eedeysay kooxda inay taageero ka helayso dalka Eritrea, inkastoo eedeymahaas aysan weli si rasmi ah uga jawaabin TPLF.
Dagaalkii u dhexeeyay ciidamada federaalka Itoobiya iyo xoogagga Tigray ee socday intii u dhexeysay 2020 iyo 2022 ayaa sababay khasaare ballaaran oo naf iyo maalba leh, waxaana lagu soo afjaray heshiis nabadeed oo lagu gaaray magaalada Pretoria ee dalka Koonfur Afrika sanadkii 2022.
Si kastaba, bilihii la soo dhaafay waxaa isa soo tarayay eedeymaha la xiriira jebinta heshiiska nabadda, iyadoo xiisaddu sii korortay kadib dagaallo iyo khilaafyo siyaasadeed oo mar kale ka dhex muuqday gobolka Tigray.
Dowladda Itoobiya ayaa ugu baaqday dhinacyada saameynta ku leh TPLF iyo taageerayaasheeda inay ka shaqeeyaan ka hortagga dagaal cusub, iyadoo ka digtay in colaad kale ay cawaaqib culus ku yeelan karto Itoobiya iyo guud ahaan Geeska Afrika.
Dhanka kale, TPLF ayaa weli awood muuqata ku leh gudaha gobolka Tigray, iyadoo khilaafyada siyaasadeed iyo muranka maamulka gobolka ay sii adkeeyeen dadaallada dib-u-heshiisiinta iyo hirgelinta heshiiskii Pretoria.
Xiisaddan cusub ayaa kusoo aadeysa xilli Itoobiya ay sidoo kale wajahayso amni darro iyo colaado ka jira gobollada kale ee dalka, gaar ahaan Amhara iyo Oromia, taas oo sii kordhisay walaaca ku saabsan xasilloonida dalka.
Dadka falanqeeya arrimaha gobolka ayaa ka digaya in haddii dagaal cusub uu ka qarxo Tigray uu saameyn ku yeelan karo amniga, dhaqaalaha iyo xaaladda bini’aadantinimo ee Geeska Afrika oo dhan.
