Wararka24: Wasiirka Arrimaha Dibedda iyo Iskaashiga Caalamiga ah ee Somaliland Cabdiraxmaan Daahir Aadan Bakaal ayaa sheegay in Itoobiya ay leedahay baahi la xiriirta helitaanka marin-badeed, isagoo xusay in Somaliland diyaar u tahay wadahadal kasta oo arrintaas ku saabsan.
Wareysi uu siiyay wargeyska The Reporter ee Itoobiya, ayuu wasiirku ku sheegay in Somaliland ay fahamsan tahay baahida Itoobiya u qabto deked iyo marin ganacsi oo ay isticmaasho. Wuxuu sheegay in xukuumaddiisu ay diyaar u tahay inay kala hadasho Addis Ababa fursadaha iskaashi ee la xiriira arrimahaas.
Cabdiraxmaan Bakaal ayaa tilmaamay in xiriirka Somaliland iyo Itoobiya uu yahay mid soo jireen ah, isla markaana labada dhinac ay wadaagaan danaha amniga, ganacsiga iyo horumarka gobolka. Wuxuu Itoobiya ku sifeeyay saaxiib muhiim ah oo Somaliland ay xiriir dhow la leedahay.
Wasiirka ayaa sidoo kale sheegay in Dekedda Berbera iyo marinka ganacsi ee ku xiran Itoobiya ay weli leeyihiin awood aan si buuxda loo adeegsan. Sida uu sheegay, Somaliland waxay danaynaysaa in la xoojiyo iskaashiga dhaqaale iyo ganacsi ee labada dhinac.
Mar uu ka hadlayay heshiiskii is-afgaradka ee Somaliland iyo Itoobiya ay kala saxiixdeen sanadkii 2024, ayuu sheegay in xukuumadda Madaxweyne Cabdiraxmaan Maxamed Cabdillaahi Cirro ay sii waddo siyaasaddii ku aaddan xiriirka Itoobiya, isla markaana ay taageersan tahay wadahadal kasta oo faa’iido u leh labada dhinac.
Dhanka kale, wasiirka ayaa rajo ka muujiyay in Itoobiya mustaqbalka aqoonsato Somaliland, inkastoo uu sheegay in aan cadaadis lagu saarayn dowladda Itoobiya. Wuxuu sheegay in Somaliland ay isku dayeyso inay sii xoojiso xiriirrada diblomaasiyadeed iyo kuwa dhaqaale ee ay la leedahay dalalka gobolka.
Wuxuu ugu dambeyn ugu baaqay Midowga Afrika iyo waddamada gobolka inay si dhow u eegaan qaddiyadda Somaliland, isagoo ku dooday in xasilloonida iyo amniga ka jira Somaliland ay mudan yihiin iskaashi iyo tixgelin dheeraad ah.
