Wararka24: Taliska Ciidanka Booliska Soomaaliyeed ayaa maanta hoteelka Elite ee magaalada Muqdisho ku soo bandhigay hub kala duwan oo uu sheegay in lagu qabtay howlgal amni oo laga fuliyay gudaha hoteelka Elite. Hubka la soo bandhigay ayaa isugu jiray noocyo fudud iyo kuwo culus, iyadoo sidoo kale la arkayay qalab kale oo ay ku jiraan diyaaradaha aan duuliyaha lahayn.
Taliyaha Qaybta Guud ee Booliska Gobolka Banaadir, Macallin Mahdi, oo warbaahinta kula hadlay goobta lagu soo bandhigay hubka, ayaa sheegay in howlgalka uu qayb ka yahay dadaallada lagu xakameynayo hubka sharci darrada ah ee ku sugan caasimadda. Wuxuu xusay in hay’adaha amniga ay sii wadi doonaan tallaabooyinka lagu sugayo amniga Muqdisho.
Macallin Mahdi ayaa sheegay in aan la aqbali doonin in hub culus lagu haysto gudaha magaalada, gaar ahaan goobaha rayidka iyo xarumaha kale ee aan loo oggolayn in lagu kaydiyo hub noocaas ah. Sida uu sheegay, dowladda waxaa ka go’an hirgelinta sareynta sharciga iyo xoojinta amniga guud.
Howlgalkan ayaa kusoo aadaya xilli dowladda Federaalka Soomaaliya ay waddo olole ballaaran oo lagu uruurinayo hubka aan sharciga waafaqsanayn. Toddobaadyadii la soo dhaafay, ciidamada ammaanka ayaa howlgallo la mid ah ka fuliyay degmooyin kala duwan oo ka tirsan Muqdisho, kuwaas oo lagu soo qabtay hub iyo agab ciidan.
Wararka ayaa tilmaamaya in howlgalka hub ka dhigista uu gaaray deegaano dhowr ah oo ku yaalla gobolka Banaadir, iyadoo laamaha amniga ay sheegeen in ujeeddada ugu weyn ay tahay ka hortagga khataraha amni iyo hubka lagu isticmaali karo falal sharci darro ah.
Dhanka kale, howlgaladan ayaa socda xilli ay jiraan dadaallo siyaasadeed oo lagu dhex-dhexaadinayo dowladda iyo mucaaradka. Dadaalladaasi ayaa la filayaa inay diiradda saaraan sidii xal looga gaari lahaa khilaafaadka siyaasadeed ee la xiriira arrimaha doorashooyinka iyo wax ka beddelka dastuurka ku meel gaarka ah.
Mas’uuliyiinta dowladda ayaa ku adkeysanaya in howlgalada amniga iyo dadaallada siyaasadeed ay barbar socdaan, si loo xaqiijiyo xasilloonida dalka iyo amniga caasimadda.
