Wararka24: Korneel Abuukar Cali Boonoow, oo kamid ah saraakiisha Ciidanka Xoogga Dalka Soomaaliya, ayaa ka hadlay howlgal ay ciidamada Booliska ka fuliyeen hoygiisa ku yaalla magaalada Muqdisho. Sarkaalka ayaa sheegay in intii uu ku maqnaa furimaha dagaalka laga qaaday gaari ciidan oo yaallay gurigiisa.
Boonoow, oo ah Taliyaha Ururka 31-aad ee Guutada 3-aad, ayaa sheegay in gaariga laga qaaday gurigiisa kadib howlgal ay fuliyeen ciidamada Booliska Gobolka Banaadir. Sida uu sheegay, gaariga ayaa loo qaaday xarun Boolis, arrintaas oo uu ku tilmaamay mid u baahan faahfaahin dheeraad ah.
Sarkaalka ayaa sheegay inuusan hore uga warqabin howlgalka lagu galay gurigiisa, isla markaana aanu jirin ogeysiis ama amar sharci ah oo la soo gaarsiiyay. Wuxuu xusay in uu hadda ku guda jiro baaritaan uu ku ogaanayo sababta rasmiga ah ee ka dambeysa tallaabadaasi.
Korneel Boonoow ayaa tilmaamay in jawaabtiisa kama dambaysta ah ay ku xirnaan doonto natiijada baaritaanka socda. Wuxuu sheegay inuu doonayo in marka hore la caddeeyo cidda bixisay amarka howlgalka iyo sababta gaariga loogu wareejiyay taliska Booliska halkii loo gudbin lahaa talis ciidan.
Dhacdadan ayaa kusoo beegmeysa xilli dowladda Federaalka Soomaaliya ay waddo howlgal lagu xakameynayo hubka sharci darrada ah ee yaalla magaalada Muqdisho iyo deegaannada ku dhow. Laamaha amniga ayaa sheegay in ujeeddada howlgalka ay tahay sugidda amniga iyo hirgelinta sareynta sharciga.
Taliyaha Qaybta Guud ee Booliska Gobolka Banaadir, Macallin Mahdi, ayaa hore u sheegay in ciidamada amniga ay sii wadi doonaan howlgalka hub ka dhigista. Wuxuu shacabka ugu baaqay inay la shaqeeyaan hay’adaha amniga oo ay soo gudbiyaan xog kasta oo la xiriirta hub sharci darro ah.
Howlgalladan ayaa toddobaadyadii la soo dhaafay ka socday degmooyin kala duwan oo Muqdisho ah, iyadoo dowladda ay sheegtay inay diiradda saarayso xoojinta amniga iyo ka hortagga hubka aan sharciga waafaqsanayn.
si kulul uga hadlay howlgal ay fuliyeen ciidamada Booliska
