Wararka24: Dowladda Federaalka Soomaaliya ayaa sheegtay in ciidamada amniga ay soo gabagabeeyeen hawlgal socday muddo 48 saac ah, kaas oo ay ku tilmaantay mid looga hortagayay dhaqdhaqaaqyo hubeysan oo ka dhacay magaalada Muqdisho.
War-saxaafadeed ay soo saartay Wasaaradda Warfaafinta ayaa lagu sheegay in ciidamada ammaanka ay tallaabo ka qaadeen kooxo hubeysan oo dowladda ku eedeysay inay doonayeen inay xaalad amni darro ka abuuraan caasimadda.
Qoraalka dowladda ayaa lagu sheegay in kooxahaasi ay ku hubeysnaayeen hub culus, islamarkaana ay ka howlgalayeen xaafado ka tirsan Muqdisho. Dowladda waxay ku eedeysay in kooxahaas ay xiriir la lahaayeen siyaasiyiin ay ka mid yihiin Xasan Cali Kheyre iyo Sheekh Shariif Sheekh Axmed.
Dowladdu waxay sheegtay in ciidamada amniga ay hub ka dhigeen xubno ka tirsan kooxahaas, isla markaana ay si taxaddar leh u maareeyeen hawlgalka si loo ilaaliyo shacabka iyo amniga guud ee magaalada.
Sidoo kale, war-saxaafadeedka ayaa lagu xusay in hay’adaha amniga iyo garsoorka ay bilaabeen baaritaanno rasmi ah, iyadoo la sheegay in cid kasta oo lagu helo inay ku lug lahayd falal sharci-darro ah la horgeyn doono cadaaladda.
Dowladdu waxay markale ku celisay in ciidamada amniga qaranka ay yihiin hay’adaha keliya ee sharci ahaan u leh haysashada iyo adeegsiga hubka, iyadoo ka digtay koox kasta ama shaqsi kasta oo ku lug yeesha abaabul ciidan ama hub sharci-darro ah.
Dhanka kale, weli kama aysan soo bixin jawaab rasmi ah oo ka timid dhinacyada mucaaradka ee lagu magacaabay war-saxaafadeedka dowladda.
Xiisadda siyaasadeed ee Muqdisho ayaa maalmihii la soo dhaafay sababtay walaac amni iyo baaqyo isdaba joog ah oo uga yimid beesha caalamka, kuwaas oo ku aaddan in khilaafaadka lagu xalliyo wada-hadal iyo is-afgarad.
