Wararka24: Madaxweynihii hore ee HirShabelle Cali Cabdullaahi Cosoble, ayaa si adag uga hadlay mowqifka siyaasadeed ee Shariif Sheekh Axmed ee ku aaddan muddo xileedka Madaxweyne Xasan Sheekh Maxamuud.
Qoraal uu ku daabacay bartiisa Facebook ayuu Cosoble uga digay Shariif Sheekh Axmed inuu qaado waddo siyaasadeed uu ku tilmaamay mid dalka gelin karta qalalaase iyo khilaaf muddo dheer socda.
Cosoble ayaa dib u xusuusiyay marxaladihii siyaasadeed ee Soomaaliya kasoo maray burburkii dowladdii dhexe sanadkii 1991, isaga oo tusaale usoo qaatay khilaafkii u dhexeeyay Jeneraal Maxamed Faarax Caydiid iyo Cali Mahdi Maxamed.
“Jen Caydiid waxa uu sanadkii 1991 diiday labo sano oo uu Cali Mahdi madaxweyne ka ahaado Soomaaliya. Waxay dhashay Cali Mahdi inuu ahaa madaxweyne ilaa iyo sanadkii 2000,” ayuu yiri Cosoble.
Sidoo kale, wuxuu sheegay in haddii maanta la diido muddo kordhinta uu sharci ku tilmaamay, ay taasi horseedi karto xaalad sii dheeraata oo la xiriirta hoggaanka dalka iyo doorashooyinka mustaqbalka.
Muranka siyaasadeed ee u dhexeeya dowladda federaalka iyo mucaaradka ayaa xoogeystay toddobaadyadii u dambeeyay, iyadoo dhinacyadu ay isku khilaafsan yihiin muddo xileedka hay’adaha federaalka, wax ka beddelka dastuurka iyo nooca doorasho ee dalka ka dhaceysa.
Mucaaradka oo uu kamid yahay Shariif Sheekh Axmed ayaa ku doodaya in muddo xileedka afarta sano ee Madaxweyne Xasan Sheekh uu dhammaaday 15-kii May 2026, halka dowladda federaalka ay sheegtay in wax ka beddelka dastuurka cusub uu dhigayo muddo xileed shan sano ah.
Villa Somalia ayaa ku adkeysaneysa in isbeddellada dastuuriga ah ay ku saleysan yihiin hannaan sharci iyo go’aanno ay ansixiyeen hay’adaha dowladda, halka mucaaradku ay qabaan in aan lagu dhaqaaqi karin isbeddel siyaasadeed oo waaweyn iyada oo aan la helin heshiis qaran oo loo dhan yahay.
Xiisadda siyaasadeed ee ka taagan Muqdisho ayaa sii xoogeysatay maalmahan, iyadoo ay socdaan kulamo, dibadbaxyo iyo dadaallo ay odayaasha dhaqanka ku doonayaan in lagu helo xal siyaasadeed oo lagu dejiyo xaaladda dalka.
