Wararka24: Guddoomiyaha Gobolka Banaadir ahna Duqa Magaalada Muqdisho, Xasan Maxamed Xuseen (Muungaab), ayaa maanta booqasho shaqo ku tagay xerada tababarka ciidamada ee TurkSom, halkaas oo lagu tababaro ciidamada kala duwan ee Xoogga Dalka Soomaaliyeed.
Duqa Muqdisho ayaa kulan la yeeshay saraakiisha iyo mas’uuliyiinta xerada, waxaana ay ka wada hadleen arrimo la xiriira amniga, xasilloonida caasimadda iyo sidii loo xoojin lahaa wada-shaqeynta u dhexeysa maamulka Gobolka Banaadir iyo hay’adaha amniga.
Mas’uuliyiinta TurkSom ayaa guddoomiyaha gobolka siiyay warbixinno ku saabsan tababarrada ciidamada, dib-u-dhiska iyo tayeynta Ciidanka Xoogga Dalka Soomaaliyeed, iyo doorka xeradu ku leedahay taageeridda dadaallada amniga ee dalka.
Kulanka ayaa sidoo kale diiradda lagu saaray qorshayaal lagu taageerayo shacabka danyarta ah inta lagu jiro munaasabadda Ciidul Adxaa ee soo socota. Labada dhinac ayaa ka wada hadlay sidii loo xoojin lahaa adeegyada bulshada iyo gargaarka loo fidinayo qoysaska nugul.
Saraakiisha TurkSom ayaa muujiyay sida ay uga go’an tahay sii wadista wada-shaqeynta ay la leeyihiin maamulka Gobolka Banaadir, si loo xoojiyo amniga, loo horumariyo adeegyada bulshada, loona taageero dadaallada lagu sugayo xasilloonida Muqdisho.
Booqashadan ayaa qeyb ka ah dadaallada maamulka Gobolka Banaadir ee lagu xoojinayo xiriirka kala dhexeeya hay’adaha amniga iyo ciidamada qalabka sida, si loo sii adkeeyo nabadda iyo horumarka caasimadda.
TurkSom ayaa ka mid ah xarumaha ugu waaweyn ee lagu tababaro ciidamada Soomaaliya, waxaana ay door muuqda ka qaadatay soo saarista cutubyo badan oo ka tirsan Ciidanka Xoogga Dalka Soomaaliyeed.
