Wararka24: Waxaa maalintii labaad galay wada hadallada u dhexeeya Dowladda Federaalka Soomaaliya iyo Golaha Mustaqbalka Soomaaliyeed, kuwaas oo ka socda gudaha xerada Xalane ee magaalada Muqdisho.
Kulamadan oo ku bilowday jawi deggan ayaa waxaa la sheegay inuu door dhexdhexaadin ah ku leeyahay Mareykanka, iyadoo dhinacyada ay ka wada hadlayaan khilaafka siyaasadeed ee ka taagan dalka.
Dhinaca dowladda waxaa shirka uga qayb-galaya Madaxweynaha Soomaaliya, Xassan Sheekh Maxamud, iyo Ra’iisul Wasaare ku xigeenka dalka, Saalax Axmed Jaamac, halka Golaha Mustaqbalka ay metelayaan Madaxweynaha Puntland, Saciid Deni iyo Madaxweyne hore Sheekh Shariif Sheekh Axmed.
Wararka ayaa sheegaya in maanta la guda geli doono doodaha ugu xasaasisan ee la xiriira wax ka beddelka dastuurka iyo hannaanka doorashooyinka, kuwaas oo saldhig u ah khilaafka u dhexeeya labada dhinac.
Mucaaradka oo taageero ka helaya maamulada Puntland iyo Jubbaland ayaa la filayaa inay soo bandhigaan aragtidooda ku aaddan nooca doorasho ee dalka ka dhici karta, halka Villa Somalia ay ku adkeysaneyso hirgelinta doorasho qof iyo cod ah.
Labada dhinac ayaa xalay yeeshay kulamo gaar gaar ah oo ay la-tashiyo kula sameeyeen dhinacyada ay metalaan, si loo sii ambaqaado wada hadallada loona gaaro xal siyaasadeed oo laga wada heshiiyo.
Dhanka kale, Wasiirka Gaashaandhigga Soomaaliya, Axmed Macallin Fiqi, ayaa sheegay in shirka uu ka socdo xarun dowladeed oo ku dhex-taalla Xalane, isagoo mucaaradka ku eedeeyay inaysan lahayn ajende cad.
“Shirka madaxda dalka iyo kooxda mucaaradku xafiis dowladdu leedahay ayuu ka dhacayaa,” ayuu yiri wasiirka oo qoraal soo saaray.
Kulankan ayaa noqonaya kii ugu horreeyay ee noociisa ah ee lagu qabto gudaha Xalane, iyadoo beesha caalamka ay dadaal ugu jirto in xal looga gaaro muranka ka taagan arrimaha doorashooyinka iyo dastuurka Soomaaliya.
