Wararka24: Warar isa soo taraya ayaa sheegaya in Madaxtooyada Soomaaliya ay taageeradeeda u weecisay siyaasiga Liibaan Axmed Xasan, kaas oo la sheegay inuu noqon doono musharraxa ay ku taageereyso doorashada madaxtinnimada Galmudug ee la filayo inay dhacdo bisha July.
Xogaha la helayo ayaa tilmaamaya in la qorsheynayo munaasabad lagu shaacinayo taageerada siyaasigan, taas oo lagu qaban doono xarunta xisbiga Cadaaladda iyo Wadajirka (JSP) ee uu hoggaamiyo Madaxweyne Xassan Sheekh Maxamud.
Wararka ayaa sidoo kale sheegaya in loollan xooggan uu ka taagan yahay cidda loo xulan doono musharraxa madaxweyne ku-xigeenka Galmudug, iyadoo siyaasiyiin kala duwan ay wadaan dadaallo ay ku raadinayaan taageerada xisbiga talada haya.
Sida la sheegay, kulamo iyo wada-hadallo hoose ayaa socda si loo yareeyo khilaafaadka iyo tartanka ka dhex jira xubnaha doonaya xilalka sare ee maamulka Galmudug.
Dhanka kale, magaalada Dhusamareb ayaan weli laga dareemin olole siyaasadeed oo si weyn u muuqda, waxaana aan si rasmi ah loo ogeyn mowqifka uu qaadan doono Madaxweynaha Galmudug, Axmed Cabdi Kaariye (Qoor-Qoor), marka ay soo dhowaato doorashada maamulkaasi.
Arrintan ayaa kusoo beegmeysa xilli uu sii xoogeysanayo loollanka siyaasadeed ee la xiriira doorashooyinka Galmudug, iyadoo dhinacyada kala duwan ay bilaabeen dhaqdhaqaaqyo lagu xoojinayo saameyntooda siyaasadeed.
Wararka siyaasadeed ayaa sidoo kale sheegaya inuu jiro ismaandhaaf u dhexeeya Madaxweyne Xasan Sheekh iyo Madaxweyne Qoor-Qoor, kaas oo la xiriira doorashooyinka soo socda iyo mustaqbalka hoggaanka Galmudug.
Qoor-Qoor ayaa lagu warramayaa inuu doonayo inuu mar kale isku soo taago xilka madaxtinnimada Galmudug, halka wararku sheegayaan in Dowladda Federaalka ay taageereyso musharrax kale. Ilaa hadda ma jiro war rasmi ah oo kasoo baxay Villa Somalia ama maamulka Galmudug oo si cad u xaqiijinaya wararkan.
