Wararka24: Guddiga Madaxa bannaan ee Doorashooyinka Qaranka iyo Soohdimaha ayaa maanta shaaciyay natiijada doorashooyinkii goleyaasha wakiillada iyo deegaanka ee ka dhacay deegaanada maamulka Koonfur Galbeed Soomaaliya.
Doorashooyinkan oo laga qabtay 13 degmo ayaa lagu doortay xubnaha goleyaasha deegaanka iyo baarlamaanka maamulkaasi, iyadoo ay ka qayb-galeen 32 urur siyaasadeed.
Guddoomiyaha guddiga, Cabdikariin Axmed Xasan, oo shir jaraa’id qabtay ayaa sheegay in illaa 132,430 qof oo qaatay kaararka codbixinta ay ka qeyb-galeen doorashada, isla markaana si nabad ah ay ku dhacday.
Cabdikariin ayaa sidoo kale shaaciyay sida ururrada siyaasadeed u kala heleen kuraasta Golaha Wakiillada oo gaaraya 95 kursi. Sida natiijada lagu dhawaaqay, ururka JSP ayaa helay kuraasta ugu badan kadib markii uu ku guuleystay 51 kursi.
Ururka NPU ayaa helay 14 kursi, halka ururka Karaama uu helay 11 kursi. Sidoo kale, ururka SINCAD ayaa helay 6 kursi, halka ururka Tiir uu ku guuleystay 3 kursi. Qaar kamid ah ururradii kale ayaa helay hal kursi, halka kuwo kale aysan wax kursi ah helin.
Guddiga doorashooyinka ayaa sidoo kale shaaciyay natiijada doorashooyinka goleyaasha deegaanka ee laga qabtay 13-ka degmo, kuwaas oo loo tartamay 297 kursi, iyadoo ay sidoo kale ka qayb-galeen 32 urur siyaasadeed.
Doorashooyinkan ayaa kusoo aaday xilli uu jiro muran siyaasadeed oo xooggan oo ka taagan hannaanka doorashooyinka iyo xaaladda kala guurka ee dalka. Mucaaradka iyo maamulada Puntland iyo Jubbaland ayaa weli ka soo horjeeda hirgelinta doorashooyinka qof iyo codka ah.
Ilaa hadda lama oga in dhammaan ururradii siyaasadeed ee ka qayb-galay doorashada ay aqbali doonaan natiijada uu guddigu maanta shaaciyay.
