Wararka24: Wasiirka Arrimaha Gudaha ee Dowladda Federaalka Soomaaliya, Cali Yuusuf Cali Xoosh, ayaa eedeymo culus u jeediyay Madaxweynaha Puntland, Siciid Cabdullaahi Deni, isaga oo ku eedeeyay inuu caqabad ku yahay dowladnimada, midnimada iyo horumarka Soomaaliya.
Qoraal uu ku daabacay bartiisa Facebook ayuu wasiirku ku sheegay in war-murtiyeedkii kasoo baxay Puntland uusan u adeegeyn shacabka Soomaaliyeed, balse uu qeyb ka yahay waxa uu ku tilmaamay dadaallo lagu carqaladeynayo geeddi-socodka dowlad-dhiska dalka.
Cali Xoosh ayaa sheegay in siyaasadda Deni ay ku dhisan tahay ka hor imaanshaha qorshayaasha horumarineed iyo taageeridda arrimo horseedi kara kala qeybsanaan iyo dib u dhac siyaasadeed.
Wasiirka ayaa sidoo kale ku eedeeyay Madaxweynaha Puntland inuu hore uga horyimid qorshayaal ay kamid yihiin deyn cafinta Soomaaliya, hirgelinta doorashooyin loo dhan yahay, ka faa’iideysiga khayraadka dalka iyo dhismaha ciidamada qaranka.
Sidoo kale, wuxuu sheegay in Puntland mararka qaar loo adeegsaday cadaadis siyaasadeed oo lagu saaro dowladda dhexe, isagoo ku dooday in taasi ay dhaawacayso dadaallada lagu xoojinayo dowladnimada Soomaaliya.
Hadalkan ayaa yimid maalin kadib markii Puntland ay shaacisay in aysan aqoonsanayn sharciyadda Madaxweyne Xassan Sheekh Maxamud, isla markaana ay ku baaqday in la qabto shir siyaasadeed oo degdeg ah oo looga arrinsanayo mustaqbalka siyaasadeed ee dalka.
Puntland ayaa dhankeeda ku adkeysatay in loo baahan yahay wada-hadal iyo heshiis siyaasadeed oo ay ka qeyb galaan dhammaan dhinacyada Soomaaliyeed si looga gudbo khilaafaadka taagan loona gaaro hannaan doorasho oo loo dhan yahay.
Hadalladan is dhaafsiga ah ayaa kusoo aadaya xilli ay sii kordhayaan xiisadaha siyaasadeed ee u dhexeeya Dowladda Federaalka Soomaaliya iyo Puntland, iyadoo dhinacyadu ay weli isku khilaafsan yihiin arrimo la xiriira doorashooyinka iyo sharciyadda hay’adaha dowladda.
