Wararka24: Hay’adda Sirdoonka iyo Nabadsugidda Qaranka ee NISA ayaa shaacisay in ciidamada dowladda Soomaaliya oo kaashanaya saaxiibada caalamka ay howlgallo duqeyn ah ka fuliyeen deegaanno ka tirsan gobolka Hiiraan.
Sida lagu sheegay war-saxaafadeedka hay’adda, howl-gallada ayaa ka dhacay deegaannada Maxaas, Mukayle iyo Shaw, waxaana lagu beegsaday maleeshiyaad iyo xarumo ay kooxda Al-Shabaab ku lahaayeen halkaasi.
NISA ayaa sheegtay in howl-galladan lagu dilay 26 xubnood oo ka tirsanaa kooxda, isla markaana lagu burburiyay goobo lagu keydin jiray hub, gaadiid iyo xarumo ay kooxda u adeegsan jirtay abaabul iyo dhaqdhaqaaqyo ciidan.
War-saxaafadeedka ayaa tilmaamay in howlgalka ka dhacay nawaaxiga degmada Maxaas lagu beegsaday maleeshiyaad ku sugnaa isgoyska Madaxya-weyn. Hay’addu waxay sheegtay in halkaasi lagu dilay 14 xubnood, laguna gubay teendhooyin iyo gabaadyo ay kooxda isticmaali jirtay.
Howlgal kale oo ka dhacay deegaanka Mukayle ayay NISA ku sheegtay in lagu dilay sagaal xubnood, oo uu ku jiro horjooge lagu magacaabay Sadaam oo la sheegay inuu ahaa ku xigeenka deegaankaas. Hay’addu waxay sidoo kale sheegtay in 16 kale lagu dhaawacay howlgalkaasi.
Dhanka kale, duqeyn ka dhacday deegaanka Shaw ayaa lagu bartilmaameedsaday xarumo lagu kaydiyo laguna dayactiro hubka. NISA ayaa sheegtay in goobtaas lagu dilay saddex xubnood oo ay ku tilmaamtay farsamo-yaqaanno ka tirsanaa kooxda, isla markaana la burburiyay gaari nooca Hoomeyda ah.
Ilaa hadda ma jiro war madax-bannaan oo si rasmi ah u xaqiijinaya khasaaraha ay sheegtay NISA, waxaana sidoo kale aan wax jawaab ah kasoo bixin kooxda Al-Shabaab oo ku aaddan howl-galladan.
Howl-galladan ayaa kusoo aadaya xilli dowladda Soomaaliya ay sii waddo dagaalka ka dhanka ah Al-Shabaab, iyadoo gobolka Hiiraan uu kamid yahay meelaha ay si joogto ah uga socdaan howlgallada milatari iyo duqeymaha lagu beegsanayo kooxda.
