Wararka24: Ciidamada ammaanka dowladda federaalka Soomaaliya ayaa xalay howlgallo ballaaran oo guri-guri ah ka sameeyay degmada Dayniile ee magaalada Muqdisho, gaar ahaan xaafadaha Raadeerka iyo deegaano kale oo ku dhow halkaasi.
Dadka deegaanka ayaa sheegay in ciidamada ay gudaha u galeen guryo badan, iyagoo baaritaanno ku sameynayay hub sharci darro ah iyo arrimo la xiriira amniga. Qoysas badan ayaa la sheegay in si ku meel gaar ah looga saaray guryahooda inta ay socdeen baaritaannada.
Wararka laga helayo dadka deegaanka ayaa tilmaamaya in aan si rasmi ah loo xaqiijin wax hub ah oo laga helay guryihii la baaray. Ciidamada ayaa howlgalka kadib dib uga baxay xaafadaha ay ka sameeyeen baaritaanka.
Howlgalladan ayaa yimid kadib kulan amni oo maalin ka hor lagu qabtay degmada Dayniile, kaas oo ay ka qeybgaleen saraakiil booliis, xubno ka tirsan Hay’adda Nabad Sugidda iyo Sirdoonka Qaranka ee NISA iyo ciidamada booliiska militariga.
Guddoomiyaha degmada Dayniile, Cabdiraxmaan Macallin Xuseen, ayaa sheegay in ujeedka howlgalka uu ahaa xoojinta ammaanka degmada iyo guud ahaan magaalada Muqdisho, maadaama la filayo munaasabado iyo fasaxyo soo socda.
“Ujeeddada ugu weyn ee howlgallada guri-guriga ah waxay ahayd xoojinta ammaanka caasimadda, gaar ahaan Dayniile,” ayuu yiri guddoomiyaha degmada, isagoo xusay in tallaabooyinkaasi looga hortagayo falal amni darro iyo weerarro ay geystaan kooxo hubeysan.
Dhanka kale, degmada Dayniile ayaa toddobaadyadii lasoo dhaafay laga soo sheegayay xiisado u dhexeeya ciidamada dowladda iyo shacabka deegaanka. Dadka deegaanka ayaa ciidamada ku eedeeyay inay wadaan howlgallo iyo burburin dhulal ay bulshada sheegtay in loo asteeyay adeegyo guud.
Qaar kamid ah dibadbaxyadii ka dhacay degmada ayaa sababay dhimasho iyo dhaawac, kadib markii shacabka ay kasoo horjeesteen tallaabooyin la xiriiray burburinta dhulalkaasi.
