Wararka24: Ra’iisul Wasaarihii hore ee Soomaaliya Hassan Cali Kheyre ayaa eedeyn culus u jeediyay Madaxweynaha Soomaaliya Xasan Sheekh Maxamud, isagoo ku accusay in ciidamo dowladeed loo adeegsaday howlgal ka dhacay degmada Dayniile ee magaalada Muqdisho.
Kheyre ayaa sheegay in ciidamada la geeyay Dayniile ay qeyb ka yihiin qorshe lagu burburinayo goobo ay deggenaayeen dad shacab ah, taas oo uu ku tilmaamay barakicin iyo ku takrifal awood dowladeed. Wuxuu qoraal uu soo saaray ku sheegay in dowladda ay shacabka ku beegsaneyso awood ciidan, halkii ay ka ilaalin lahayd.
Sidoo kale, Kheyre ayaa ciidamada ammaanka uga digay inay ku lug yeeshaan waxa uu ku sheegay falal ka dhan ah shacabka iyo hantidooda, isagoo ugu baaqay inay dhowraan waajibaadkooda qaran iyo ilaalinta xuquuqda muwaadiniinta.
Dhanka kale, Madaxweynihii hore ee Soomaaliya Sharif Sheikh Axmed ayaa isna cambaareeyay dhacdada ka taagan Dayniile, isagoo ku tilmaamay arrin culus oo u baahan isla xisaabtan iyo in si degdeg ah loo joojiyo tallaabooyinka keenaya xiisadda.
Wararka laga helayo degmada Dayniile ayaa sheegaya in halkaasi ay ka taagan tahay xiisad ka dhalatay qorshe dowladda ay ku doonayso inay ku burburiso goobo loo asteeyay dan guud, halka dadka deegaanka qaarkood ay ka biyo diideen inay ka guuraan.
Iska hor imaadyo ka dhacay deegaankaas saacadihii la soo dhaafay ayaa sababay khasaare kala duwan, inkastoo aan weli si rasmi ah loo xaqiijin tirada waxyeellada ka dhalatay.
