Wararka24: Warar laga helayo ilo siyaasadeed oo xog ogaal ah ayaa sheegaya in xubnaha mucaaradka Soomaaliya ay wadaan qorshe ay ku doonayaan in xilka ra’iisul wasaaraha loogu magacaabo shaqsi dhex-dhexaadnimo qaadan kara, isla markaana ka madax-bannaan madaxtooyada.
Mucaaradka ayaa la sheegay inay rumeysan yihiin in ra’iisul wasaare cusub oo dhexdhexaad ah uu fududeyn karo wada-hadallada siyaasadeed iyo xal u helidda muranka ka taagan hannaanka doorashooyinka iyo kala guurka dalka.
Si kastaba, arrintan ayaa dhalisay dood sharci iyo siyaasadeed, maadaama mucaaradka laftiisu uu ku doodayo in muddo xileedka dowladda federaalka uu ku egyahay 15-ka May, taas oo su’aal gelinaysa sida ay suuragal ku noqon karto in madaxweynaha magacaabo ra’iisul wasaare cusub, isla markaana baarlamaanku ansixiyo.
Wararka ayaa sheegaya in qorshahan ay si gaar ah u taageerayaan madaxda Puntland iyo Jubbaland, kuwaas oo la tilmaamay inay doonayaan hannaan siyaasadeed oo lagu dhiso xukuumad ay dhinacyadu ku wada qanacsan yihiin.
Sidoo kale, waxaa jira warar hoose oo tilmaamaya in laga yaabo in lagu heshiiyo dhismaha xukuumad ku meel gaar ah oo ay si wadajir ah ugu lug yeeshaan dowladda iyo mucaaradka, si looga gudbo xiisadda siyaasadeed ee taagan.
Dhanka kale, ilo diblomaasiyadeed ayaa sheegaya in wakiillo ka socda Mareykanka iyo Ingiriiska ay muujiyeen walaac xooggan oo ku saabsan xaaladda siyaasadeed ee Soomaaliya, iyaga oo ku boorriyay dhinacyada inay heshiis ka gaaraan masiirka dalka.
Wararka ayaa intaas ku daraya in diblomaasiyiintaasi ay ka digeen in haddii aan xal siyaasadeed la gaarin, beesha caalamka ay qaadi karto go’aanno la xiriira mustaqbalka siyaasadeed ee Soomaaliya.
Soomaaliya ayaa haatan ku jirta marxalad siyaasadeed oo aad u xasaasi ah, iyadoo weli uu taagan yahay khilaafka u dhexeeya dowladda federaalka iyo mucaaradka, kaas oo salka ku haya arrimaha doorashooyinka iyo wax ka beddelka dastuurka.
