Wararka24: Madaxweynaha maamulka Puntland Saciid Cabdullaahi Deni ayaa lagu wadaa inuu maanta so gaaro magaalada Muqdisho, xilli ay sii xoogeysaneyso xiisadda siyaasadeed ee ka taagan Soomaaliya.
Wararka la helayo ayaa sheegaya in safarka Deni uu la xiriirro kulan ay beesha caalamka qorsheyneyso inay ku dhex-dhexaadiso Dowladda Federaalka Soomaaliya iyo xubnaha mucaaradka ee ku mideysan Golaha Mustaqbalka Soomaaliyeed. Kulankaas ayaa la filayaa inuu ka dhaco gudaha xerada Halane Camp.
Dowladda Mareykanka ayaa la sheegay inay hormuud ka tahay dadaallada lagu furayo wada-hadallo rasmi ah oo looga hadlayo xaaladda siyaasadeed ee dalka. Inkastoo Dowladda Federaalka ay hore u beenisay jiritaanka qorshahaasi, haddana warar isa soo taraya ayaa tilmaamaya in kulankaasi uu dhici doono maalmaha soo socda.
Ilo xog ogaal ah ayaa sheegay in kulanka diiradda lagu saari doono muranka ka taagan hannaanka doorashooyinka iyo wax ka beddelka dastuurka. Waxaa sidoo kale la filayaa in dhinacyadu ka wada hadlaan xaaladda guud ee dalka iyo sidii loo yareyn lahaa xiisadaha siyaasadeed.
Dhinaca dowladda federaalka waxaa la filayaa inay kulanka uga qeyb galaan Xasan Sheekh Maxamuud iyo Ra’iisul Wasaare
Xamza Cabdi Barre. Golaha Mustaqbalka Soomaaliyeed ayaa waxaa ku matali doona Sharif Sheekh Axmed iyo Madaxweyne Deni. Kulankan ayaa noqonaya kii ugu horreeyay ee noociisa ah ee lagu qabto Xalane iyadoo ay garwadeen ka tahay dowladda Mareykanka. Wadahadalladan ayaa kusoo aadaya kadib markii uu fashilmay kulan hore oo uu iclaamiyay Madaxweyne Xasan Sheekh oo qorshuhu ahaa inuu ka qabsoomo Villa Somalia.
Soomaaliya ayaa haatan ku jirta marxalad siyaasadeed oo xasaasi ah, iyadoo dowladda iyo mucaaradku ay isku hayaan arrimaha doorashooyinka iyo dastuurka cusub ee dowladdu sheegtay inuu dhaqan galay.
