Wararka24: Warar kasoo baxaya magaalada Tripoli ayaa sheegaya in ciidamada ammaanka iyo kooxo dharcad ah ay maalmihii la soo dhaafay qabqabteen boqolaal muhaajiriin ah oo ku sugnaa caasimadda dalka Libya. Howlgalkan ayaa si gaar ah loogu beegsanayay dadka ajaanibta ah ee aan haysan sharciyada joogitaanka dalka.
Ilo deegaanka ah ayaa sheegay in dadka la qabtay ay kor u dhaafayaan 600 oo qof, kuwaas oo ay ku jiraan Soomaali badan. Dadka Soomaaliyeed ee howlgalka lagu qabtay ayaa lagu qiyaasay in ka badan 300 oo qof, kuwaas oo isugu jira rag, haween iyo dhalinyaro.
Soomaalida ku nool Tripoli ayaa sheegaya in ciidamada ay galeen guryo ay deganaayeen muhaajiriin, halka kuwo kale laga qabtay waddooyinka, goobaha ganacsiga iyo gaadiidka dadweynaha. Dad badan ayaa la sheegay in si degdeg ah loogu qaaday gaadiid ay wateen ciidamada howlgalka fulinayay.
Wararka ayaa tilmaamaya in dadka la qabtay la weydiinayay sharciyada ay ku joogaan dalka. Ilaa hadda lama shaacin goobaha rasmi ah ee lagu hayo dadkaasi, waxaana jirta walaac xoogan oo ay qabaan qoysaska iyo ehellada dadka la qabtay.
Qaar kamid ah Soomaalida ku nool Tripoli ayaa sheegay in howlgalka uu sababay cabsi iyo jahwareer, maadaama dad badan aysan weli helin xog ku saabsan halka lageeyay asxaabtooda iyo ehelladooda. Waxaa sidoo kale jira cabsi laga qabo in dadka la qabtay loo wareejiyo xarumo ay adag tahay in war laga helo.
Liibiya ayaa muddo dheer ahayd marin ay adeegsadaan muhaajiriinta ka yimaada dalalka Afrika ee doonaya inay u gudbaan qaaradda Yurub. Dad badan ayaa sanadihii dambe ku xayirmay dalkaasi, iyagoo wajahaya xaalado amni iyo mid nololeed oo adag.
Howlgalkan cusub ayaa sare u qaaday walaaca ku saabsan xaaladda muhaajiriinta Soomaalida ee ku sugan Liibiya, xilli ay sii kordhayaan cabashooyinka la xiriira xarigga iyo xaaladaha adag ee ay la kulmaan dadka ajaanibta ah.
