Wararka24: Ciidanka Booliska Waqooyi Bari, gaar ahaan qeybta gobolka Sool ayaa howlgal qorsheysan ku soo qabtay eedeysane lagu magacaabo Farxaan Farax Shaciye, kaas oo lagu eedeeyay inuu hormuud u ahaa falal la xiriira tahriibinta dhalinyarada iyo khiyaano lacageed.
Howlgalka oo ay boolisku kaashadeen shacabka deegaanka ayaa lagu sheegay mid lagu burburiyay shabakad si sharci darro ah dadka ugu tahriibin jirtay dibadda, gaar ahaan waddada halista badan ee loo maro dalka Libya.
Sida ay sheegeen laamaha ammaanka, ninkan ayaa fududeyn jiray tahriibinta dhalinyaro ka kala imaneysay magaalooyinka Laascaanood iyo Buuhoodle, isagoo adeegsan jiray muuqaallo been abuur ah oo lagu muujinayo dhalinyaro lagu dhibaateynayo xeebaha Libya, gaar ahaan magaalada Benghazi.
Booliska ayaa sheegay in muuqaalladaasi loo adeegsan jiray cabsi gelinta waalidiinta, si looga qaado lacago lagu sheegay madax furasho ama badbaadin, halka baaritaannada hordhaca ah ay muujinayaan in muuqaallada qaarkood lagu duubi jiray gudaha dalka.
Ciidamada ammaanka ayaa sidoo kale soo celiyay qaar ka mid ah dhalinyaradii uu eedeysanuhu tahriibinayay, iyagoo soo bandhigay caddeymo lacageed oo la xiriira lacagihii laga qaaday dhalinyaradaas, kuwaas oo loo marsiin jiray adeegyada lacag-dirista.
Eedeysanaha ayaa haatan ku jira gacanta booliska, waxaana socda baaritaanno dheeraad ah si sharciga loo horgeeyo, iyadoo laamaha ammaanku sheegeen inay sii wadi doonaan howlgalada lagu burburinayo shabakadaha tahriibinta dhalinyarada.
